Hoko ‘a Fekita ‘Utoikamanu ko e Fakafofonga Ma’olunga ‘a e UN ki he Ngaahi fonua langalanga hake Featured
Fekita 'Utoikamanu lolotonga 'e'ne hoko koe 'Amipasitoa 'a Tonga ki he Pule'anga Fakatahataha (UN)
14 'Epeleli, 2017. Kuo fokotu’u ‘e he Sekelitali Seniale ‘a e Pule’anga Fakatahataha (United Nations) Antonio Guterres ‘a Fekita ‘Utoikamanu ‘o Tonga kene hoko ki he lakanga ko e Fakafofonga Ma’olunga ‘a e UN ki he Ngaahi fonua langalanga hake (UN's new High Representative for the Least Developed Countries, Landlocked Developing Countries and Small Island Developing States).
Ko e lakanga foki ‘eni ‘i he lēvolo ma’olunga ‘i he Pule’anga Fakatahataha pea koe ongoongo fakafiefia foki ‘eni ki he Pasifiki pehē ki Tonga ni foki.
Na’e fakahā foki ‘e he Talekita Seniale ‘a e Komiunitī ‘a e Pasifiki (SPC) ‘a ‘enau fiefia hono fokotu’u ko’eni ‘o Fekita ki he lakanga ni pea ko Fekita ko e tokotaha tipilomētika lelei pea faka’apa’apa’ia foki.
Na’e hoko foki ‘a e Fekita ‘Utoikamanu koe Tokoni Talēkita Seniale ‘a e SPC, Memipa 'o e Kosilio Pule 'a e 'Univesiti 'o e Pasifiki Tonga kimu’a pea toki foki mai ki Tonga ni ‘o hoko koe CEO ‘a e Potungāue Takimamata ‘i he kamata’anga ‘o e ta’u ni.
Kimu’a ai na’a ne ngāue faka-Pule’anga pe pea na’a ne hoko ko e Sekelitali ‘a e Potungāue ki Muli, ‘Amipasitoa ‘a Tonga ki he Pule’anga Fakatahataha (UN) ki mu’a pea ne hiki ‘o ngāue ‘i Fisi.
Ko e mole lahi ‘eni ki he Pule’anga pea koe fuofua Tonga ‘eni kuo ne a’usia ‘a e tu’unga ma’olunga taha ‘i he Pule’anga Fakatahataha.
'Oku ma'u husepaniti 'a Feikita 'Utoikamanu kia Siosiua 'Utoikamanu 'a ia koe Minisitā Pa'anga malōlō ia 'a e Tonga ni.
