Toe malōlō mo e Tiuta Lahi Fefine Kolisi Mailefihi Siu’ilikutapu Featured
Tiuta Lahi Fefine Kolisi Mailefihi Siu'ilikutapu
2 Sanuali, 2017. Kuo toe ma’u moe ongoongo fakaloloma mei Nu’usila ‘o fakapapau’i kuo toe pekia moe Tiuta Lahi fefine ‘o e Kolisi Mailefihi Siu’ilikutapu Leotisia Malakai 'i he 'aho 'aneafi 1 Sanuali 2017 'i he Falemahaki Waikato 'i Hamilton.
Ko Leotisia Malakai foki na’e kau ‘i he kau lavelavea lalahi ‘i he fakatu’utamaki na’e hoko ki he kau folau ‘a e Kolisi Mailefihi Siu’ilikutapu ‘i he mafuli ‘a e pasi ‘ofi ki Gisbonre ‘i he pō 24 ‘o Tisema 2016.
Kuo mahino foki koe pekia ko’eni ‘a si’i Leotisia koe tupu mei he lavelavea lalahi na’a hoko kiate ia mei he fakatu’utamaki ko’eni.
Na’e kau foki ‘a Leostisia ‘i hono fakapuna helekopeta mai mei he feitu’u na’e hoko ai ‘a e fakatu’utamaki ki Hamilton tupu pe mei he lavea lahi na’e hoko kiate ia.
Ko e pekia ko’eni ‘a Leotisia ‘oku ‘alu hake ai ‘a e kau pekia ‘i he fakatu’utamaki ko’eni ki he toko 3 ‘a ia ko Talita Fififta, Sione Taumalolo pea mo Leotisia Malakai.
Kuo ‘osi ‘i Tonga ni foki ‘a e sino ‘o e ongo pekia ko Talita Fifita mo Sione Taumalolo pea kuo fakafolau at hona sino 'i he pongipongi 'o e 'aho ni ki Vava'u.
'I ha fakamatala 'a e ongoongo 'a Letio Nu'usila 'oku mahino mai 'oku lolotonga tokoto 'a e toko 4 he Falemahaki Middlemore 'i 'Aokalani pea 'oku 'i ai moe tokotaha 'oku tokoto he Falamahaki Hasting.
‘Oku ‘i ai ‘a e manatu melie 'a e kaunga ako, kaunga Kolisi Tutuku, moe kaunga ngaue ki he Tiuta Lahi tonunga ko’eni ‘o e Kolisi Mailefihi Siu’ilikutapu.
Kuo laka hake he ta’u ‘e 30 ‘a e fai fatongia 'a Leotisia Malakai ma’ae Kolisi mo e Siasi Uesiliana Tau’ataina ‘o Tonga.
