Fakatau Nima Kilu ($500,000) Potungāue Ngaahi Ngāue Lalahi Me’angāue ‘a Tomifā Paea ^Featured

Ko e ngaahi me’angāue ko’eni ‘oku lava ke mamata kiai ‘a e tokotaha kotoa he ‘oku nau pākingi kotoa ‘i Poutaha ‘o hoko atu ki ke Falekoloa Sonasi (EM Jones) ‘a ia ko e ‘elia foki ‘eni na’e ngāue’aki ‘e he Kautaha Vava’u Construction lolotonga ‘enau tanuhala na’e fakahoko ‘i Tongatapu ‘i he ngaahi ta’u kuo maliu atu.

Na’e tali foki mo fakapaasi ‘e he Kapineti ‘e fakahoko ‘a e fakatau mai ko’eni  pea ‘oku fe’unga ‘a e mahu’inga ‘o e me’angāue ko’eni mo e pa’anga ‘e Nima Kilu ($500,000) pea koe me’angāue ko’eni ko e me’angāue sekeniheni pea na’e ‘osi ngāue’aki ‘e he Kautaha Vava’u Construction ‘i he ta’u nai ‘e 4 kimu’a ‘eni mo hono ‘amanaki fakatau atu ki he Potungāue ‘a e Ngaahi Ngāue Lalahi.

‘Oku ‘i ai ‘a e hoha’a lahi heni ki he tu’unga ‘oku ‘i ai ‘a e teuaki fakatau koeni he ko e ngaahi me’angāue ko’eni ‘oku lava ke mamata atu pe kiai ‘a e kakai ‘o e fonua mo ‘ilo’i ‘a e tūkunga ‘oku ‘i ai pea ‘oku lahi ‘a e ngaahi me’angāue ai ‘oku ‘osi mahino mai pe kuo nau si’i tō tau. ‘Oku ‘i ai mo e konga ‘e fu’u fiema’u lahi ia ‘e ha misiume makatu’unga ‘i hono motu’a mo e motolo ‘oku ‘i ai he ‘oku faingata’a ke toe ma’u.

‘Oku fehu’ia heni pe ‘oku fakahoko ‘a e ngāue ko’eni ‘o fakatatau ki he lao fakatau ‘a e Pule’anga (Procurement Regulations) pea na’e fakahoko hano fakamahu’inga ‘e ha kau fakamahu’inga tau’atāina pe ‘oku kei lele pe he founga na’e faka’ilo Faka Fale Alea ai ‘a Minisitā ‘o e Potungāue ko’eni ‘Etuate Lavulavu.

‘Oku ‘i ai ‘a e hoha’a lahi faufaua heni ‘a e kakai ‘o e fonua he ko e fakatau ‘eni ‘oku lolotonga fakahoko e ngāue kiai ke fakahoko ‘e he Potungāue tatau mo e Minisitā tatau pea ‘oku fehu’ia lahi ‘a e tu’unga falala’anga ‘o makatu’unga he ngaahi me’a kuo ‘osi hoko pea kuo  fakamo’oni’i.

‘Oku toe fehu’ia foki mo hono kei talitali tu’u ‘e he Kapineti ‘a e ngaahi fokotu’u ‘oku ‘oatu mei he Minisita ko’eni lolotonga ia ‘oku nau ‘ilo pe ki he ngaahi palopalema ‘e fehangahangai moe Pule’anga ‘ikai ngata ai ka ‘oku ‘ikai kenau kui pe po’uli (hūfanga he fakatapu) ka ‘oku nau malava pe ‘o mamata ki he tu’unga ‘oku ‘i ai ‘a e ngaahi me’angāue ko’eni.

‘Oku mahino foki ‘a e vāofi ‘i he vā ‘o e Minisitā ko’eni mo e tokotaha ‘oku ‘a’ana ‘a e me’angāue Tomifā Paea pea ‘oku ‘ikai puli ‘i he fonua ‘a e ngaahi fakapale kuo fakahoko ‘e he Minisitā ko’eni kia Tomifā Paea ‘o hangē kohono fakanofo ke Sea he Poate Fale’i ‘a e Takimamata pea ko’eni kuo ‘amanaki ke fakatau mai mo e ngaahi naunau fakamisiume ko’eni ke tokoni ai pe ki he tauhi vā ko’eni ‘i he funga ‘o e ivi mo e pa’anga tukuhau ‘a e fonua.

Na’e fakahoko foki ‘i he funga ‘o e tauhivā ko ‘eni mo e feinga ke totongi ‘e he Pule’anga ‘i ha founga pe 'e malava ai 'a e nō lau miliona ‘i he Pangikē ANZ ‘a Tomifā Paea ka 'oku ‘i ai 'a e fakamatala falala’anga ‘oku ki'i mohetolo atu ‘eni he ‘oku ki’i tō atu ia ki he moana vavale.

‘Oku ‘osi talamai tonu pē ‘e he hisitōlia ngāue ‘o e Minisitā ko’eni ‘i he fo’i mahina pe ko’eni ‘e 10 ‘o e Pule’anga ‘o ‘Akilisi Pōhiva ‘a e tu’unga ta’e falala’anga mo’oni pea ko e fatongia totonu ‘eni ‘o e mītia mo e kakai  ‘o e fonua ke ‘oatu ‘eni telia na’a fanongo mai aa ‘a e Palēmia pea fakahoko a ha ngāue ki he fa’ahinga founga ngāue ko’eni.

Kaikehe kapau ‘oku tu’ulāhoko ai pē ‘a e fakatau ko’eni lolotonga ia ‘a e fakatatali ‘a e fonua ki ha tautea ‘o e Minisitā ko’eni ‘e fakahoko ‘e he Palēmia fakatatau ki he’ene palōmesi pea ‘oku mahino mai ko hono tukuange ‘eni ha faingamālie ke fāngota faka’osi ai leva ‘a e Minisitā ‘i he kakava ‘o e kakai moe ivi ‘o e fonua kae toki fakahoko hono tautea pe ko hano toe fakapale’i.

‘I he taimi tatau ‘oku ‘i ai 'a e fifili pe koe hā ‘a e lelei ‘a e Palēmia mo e Kapineti ‘e ma’u mei heni.