Teu Ke Hihi Kae 'Ola Featured
28 'Okatopa 2015.
Tangata’eiki,
‘Oku ou nofo ‘ou fifili koeha ha toe fakanonga kiate au mo ‘eku fifili moe hoha’a koe’uhi koe kaha’u e fonua ni. Koe ngaue ne fai ‘e he Palemia mo ‘ene Kapineti moe kau fakafofonga Paati kiate au koe folofua ia e Kameli. Koe talu e lele ‘a e Faka’ilo Faka-Fale Alea ‘o Lavulavu moe faka’ikai’i ‘e Lavulavu mo tuli ‘ene tonuhia.
Hoko mai ki he Komiti moe kei tuli tonuhia pe ‘a Lavu mo ne tau toloi e ngaue ‘a e Komiti he fiema’u ‘e ne Tali. A’u mai ki he Momeniti Faka’osi kuo toki vetehia moe tangi. Koeha ne toe vetehia ai o tangi? Ne ‘osi tuku atu e faingamalie kae fakafefeka mai pe mo ‘ene totonu. Mole taimi moe pa’anga ‘a e Fale Alea. Koe Palemia, ‘oua na’a loi mai ne ‘ikai ha’ane ‘ilo ki he ngaue ko ia ‘a Lavulavu he ‘oku fakataha mo ‘ene Kapineti he ‘aho ‘oku memipa ‘a Vuna mo ‘Aisake he Komiti pea lavelave mo Mateni he kai efiafi mahalo na’a kau atu ki ai mo ha fakafamili he ‘oku memipa mo Mateni.
Kou tui koe ‘u pepa fakataha ‘a e Fale Alea ‘oku ‘ave kimu’a ki he kau memipa pea ne tonu ke mea’i ‘e he Palemia kimu’a kae ‘oua toki tu’u hake ‘o fakamatala hange nai ha fievaleloi (hufanga he fakatapu). Kaekehe ‘osi e laulau mahina moe ngaue ‘a e Fale Alea ki he Faka’ilo pea tu’u fakataha ‘a Vuna, Mateni mo 'Aisake moe Komiti ‘oku ‘i ai e case pea a’u mai ki he faka’osi kuo tu’u e Palemia ia ke ‘oange ke ne tautea. Hange koe lau “ Ke tautea he kuo fai ha hopo ke halaia?”
Koe fehu’i ‘e taha ke ‘oatu keke tautea he ne fai atu ha faka’ilo kia koe moe kapineti, ‘ikai koe Fale Alea? Koe toki mo’oni e ‘etau lea Tonga koe teu ke hihi kae ‘ola ne fai ‘e he Palemia mo ‘ene Kapineti. Toe feinga holo ke tulitonuhia he fakataha moe kau faiongoongo pea mahino ‘ikai ha toe felave, “‘Ikai toe lava ke ‘ufi’ufi’i” he ‘oku puli e Tokelau e sino kae tekeutua mai e konga ki he faka-Tonga. Ko eni toe ‘asi mai ‘a Mateni ia ‘o tala koe faka’ilo ia koe me’a he vakapuna MA60.
Pe koeha hono mo’oni e lau ko eni ka ‘oku tau sio atu pe kuo ne ‘atama mai pe he ‘aho langima’a. Koe fo’i paloti malie ne fai ‘oku hange ia koe paloveape “Kuhuu te’elo pato te ‘emo” pe koe tala 'oku kovi, namu ha'aha'a mo pango kae kei hepo pe (hufanga he fakatapu) ko e kei ‘ilo pe hala kae kei hiki nima pe. Mou ‘ofa mai aa tuku e sio mafai ka mou faitotonu ki ho’omou fuakava tukukehe ange ngaahi me’a kuo mei vaeua senituli hono teke ‘e ‘Akilisi koe Faitotonu moe pule ‘a e Lao. Ka koe ‘aho ni ‘oku nau toki fakahu ai e fo’i kupu koe “TUKUKEHE”. Hange ko eni temau tau’i e faihala TUKUKEHE ka hokomai ki homau taha, ‘E teke ‘a e pule lelei moe pule ‘a e Lao TUKUKEHE kapau te mau ngali lavea pea TUKU IA KI TAFA’AKI.
Faka'apa'apa Atu,
'Osi E Tumu
