Ko hai ‘oku ne totongi ‘a e ‘otu nofo hotele ‘a e Palēmia? ^Featured

‘Oku ‘ikai foki ke kovi ia kapau ‘oku ne totongi pe ‘e ia mei hono kato pe koe siponisoa ‘e he kau ma’u hotele ko’eni neongo ‘oku fakatu’utamaki pe mo e ‘uhinga koia ia.

Ka ‘oku ‘uhinga ‘a e fifili ko’eni he na’e ‘osi ‘i ai ‘a e ‘api na’e fakamole ‘e he Pule’anga ‘i he ta’u 2015 ‘a e pa’anga ‘e laukilu ke fakalelei’i ‘aki ‘a e Kuata Pule’anga ‘i Fasi ke me’a ai ‘a e Palemia.

‘Oku ‘i ai mo e tukuaki’i na’e ‘ohake ‘e he ngaahi mitia ‘o pehe na’e to’o mo e pa’anga ‘ova he taha kilu mei he Emergency Fund ke fakalelei’i ‘aki ‘a e ‘api ‘o e foha ‘o e Palēmia na’e vela pea na’e me’a ai ‘a e Palemia.

‘Oku mahino foki kuo hiki ‘a e Palēmia ia mei he Kuata Pule’anga ‘i Fasi pea ‘oku fehu’ia leva heni ‘a e fakamole ko’eni na’e fakahoko ‘o kau kiai mo hono fakanaunau kakato ‘a e kuata ko’eni ‘a ia na’e fakataumu’a ke me’a ai ‘a e Palēmia.

Kapau ‘oku foki ki he ‘api hono foha na’e vela pea ‘oku fakapotopoto pe ia ke me’a ai ka koe ‘otu nofo hotele ko’eni ‘oku ne ‘omai ‘a e fakatupu fifili ki he fonua.

‘Oku ‘i ai ‘a e totonu ‘a e fonua kenau ‘ilo ki he ‘uhinga ‘oku lahi nofo hotele ai ‘a e Palemia he na’e ‘ata pe mei he Falemahaki Vaiola ‘i he mahina ko Sanuali ‘o nofo ‘i he hotele Emerald pea hiki mei ai ki he hotele Tanoa pea hoko atu ai ki he hotele Little India.

Kapau ‘oku totongi ‘eni mei he pa’anga tukuhau ‘a e fonua pea ‘oku to atu ia ki he fakavalevale.

Kaikehe ko’ene toki hoko ‘eni ia he fonua ni ha me’a pehe ke hiki holo pe ‘a e Palemia ia he ngaahi hotele pea ‘oku makatu’unga ai ‘a e fifili pe ko hai ‘oku ne totongi 'eni.