Laka he mahina ‘e 1 folau faka-faito’o Pohiva Tu’i’onetoa Featured
8 Fepueli, 2018. Kuo hoko hono tuku mai ‘e he mitia faka-sosiale kuo fakamalōlō’i ‘e he Palēmia ‘a e Minisitā Pa’anga Dr. Pohiva Tui’onetoa mo hono faka’ikai’i ‘e he Palēmia ‘oku ‘ikai ke mo’oni ‘eni ke fakatokanga’i hake ai ‘oku te’eki foki mai ‘a e Minisitā ko’eni mei ‘Aositelēlia.
Na’e tukuange mai pe foki ‘e he ngaahi kautaha ongoongo ‘a e tu’utu’uni ‘a e Kapineti ‘i he ‘aho 3 ‘o Sanuali 2018 ke fakafolau faka-faito’o ‘a Pohiva Tui’onetoa ki ‘Aositelēia pea koe talu mei he folau koia ‘oku kei ‘i ‘Aositelēlia pe ‘a Tu’I’onetoa pehe ki hono uaifi.
Ko e folau ko’eni kuo laka hake ‘i he mahina ‘e taha pea ‘oku totongi ‘e he Pule’anga mei he pa’anga tukuhau ‘a e fonua ‘a e folau ko’eni.
‘Oku mahu’inga ‘a e mo’ui pea ‘oku ‘i ai pe mo e totonu ‘a Tui’onetoa ia ki heni ka ‘oku toe fu’u mahu’inga pe foki ke ‘ilo ‘e he kakai ‘o e fonua ‘a e feitu’u ‘oku hu’u kiai ‘enau pa’anga tukuhau.
'Oku 'ikai lau heni 'a e fatongia ki he fonua moe kakai 'a ia 'oku totongi pe kinauolu neongo 'oku nau mavahe mei he fatongia.
Na’e toki folau atu pe foki mo e Palēmia ki Nu’usila ko hono sivi faka-faito’o pea neongo ‘oku ‘i ai ‘ene totonu kiai ka ‘oku totonu ketau fua tauatau ‘eni ki he toenga ‘o e si’i kakai masiva ‘o e fonua ‘a ia ‘oku toutou malanga’i ke fai ‘a e ‘ofa kiai.
‘Oku tofanga ‘a e kau taki ‘i he ngaahi monū ko’eni ka ‘oku mole ‘a e mo’ui ‘a e si’i kakai masiva tokolahi ‘o e fonua ‘oku ‘ikai malava ke ‘ave faka-faito’o kinautolu.
‘I he’ene pehe leva ‘oku totonu ke tau toe sio mo vakavakai ki he ngaahi tafa’aki kimu’a pea tau malanga’aki ‘a e vahevahe taau mo e ‘ofa ki he masiva.
