Tō nai ‘i vaha’a? Featured
5 Sanuali, 2017. ‘Oku fai ‘a e fifili ‘a e Kolomu Filihi ki he tu’unga ‘oku ‘i ai ‘a e Fakafofonga Niua 17 Vatau Hui pehe ki he Fakafofonga Tongatapu 5 Losaline Ma’asi hili ‘a hono tukumai ‘e he ngaahi kautaha ongoongo ‘a e Kapineti fo’ou ‘a e Palēmia ‘Akilisi Pohiva.
‘Oku mahino foki ‘oku ‘ikai kau ‘a e tokoua ko’eni ki he Kapineti pe tena ma’u ha lakanga minisitā pea ‘oku tu’unga ai ‘a e fifili ‘a e kolomu ni.
Kapau tetau filihi ‘a e fifili ko’eni pea ‘e malava ketau pehe na’e palōmesi kiate kinaua ha tu’unga ‘i he Kapineti ‘o makatu’unga ai ‘ena pipiki ki he PTOA pea ko’eni ‘oku ‘ikai hoko.
‘Oku mahino pe ‘a e ongo Fakafofonga Ha’apai ia ‘a Mo’ale Finau pea mo Veivosa Taka he koe ongo poupou fefeka ‘o e PTOA talu mei mu’a pea ‘oku malava pe kena tali hapo mo tali koau ki ha angi mei taumu’a ‘a e Seniale.
Ko e ongo Fakafofonga ko’eni ‘oku fai hono filihi he na’e ‘i ai ‘a e ngaahi makatu’unga na’e poupou mai ai ‘a e kainga mei he ongo motu mama’o ‘i he ‘uhinga ‘e ‘i ai ha tu’unga minisita ke fakafaingofua ai ‘a e tokoni ange kiate kinautolu hange koia na’e fakahoko ‘e Vakatā.
‘I he taimi tatau ‘oku fai hono filihi ‘a e ‘uhinga hono tukuange ‘o Losaline Ma’asi ‘ikai ‘oange kiai ha tu’unga minisita lolotonga ia ‘oku ‘i ai ‘ene taukei ngāue lahi pea na’e ‘i ai mo ‘ene fiema’u lolotonga ‘a e fakatauhoosi kapau ‘e nga’unu ki he tafa’aki ‘a e Hou’eiki pea kuo ‘osi tuku mai ia ‘e he mītia faka-sosiale.
‘Oku ‘uhinga pehe hono filihi ‘o e kaveinga ni pea ‘e malava ke pehe ‘oku ‘ikai fe’unga ‘a Vatau Hui mo e lakanga minisitā pea ‘oku ‘ikai ke falala’anga ‘a e tu’unga ngāue ‘a Losaline Ma’asi.
‘Oku toe malava pe ke ‘i ai ha lakanga ‘oku toe lelei ange kuo tukumuli ‘e he taki ke puke ‘aki ‘a e ongo Fakafofonga ni ka ‘oku ‘ikai ke ‘uhinga lelei pe koe hā ha toe lakanga ‘e toe ma’olunga ange ‘i ha’ate kau ki he Kapineti 'o 'ikai ngata 'a e malava ai 'ete visone langa fakalakalaka ki he vahenga fili ka ‘e tokoni lahi ia ki he fatongia faka-Fale Alea.
Kaikehe ko e anga pe ia hono filihi ‘e he kolomu ni ‘a e ngaahi manuva faka-politikale ‘oku hoko fekau’aki mo hono fili ‘etau Kapineti pea ‘e toe malava pe ia ke tau pehe kuo na tō ‘i vaha’a.
