Fiema’u ha kau loea ki he ‘Ofisi Palēmia: Feme’a’aki ‘i he Patiseti ^Featured

Ko e me’a ‘oku malie heni koe feme’a’aki fekau’aki mo e patiseti ‘a e ‘Ofisi ‘o e Palēmia mo e fiema’u ha kau loea kenau ngāue fakalao 'i he ‘Ofisi ‘o e Palēmia.

‘Oku mahino mai ko hono toki fokotu’u ‘eni ha me’a pehē ‘i he ‘Ofisi ‘o e Palēmia pea koe fakakaukau fo’ou ‘eni ‘a ia ‘oku malava pe ke fehu’ia hono ‘uhinga makatu’unga he’ene fo’ou.

Na’e fehu’ia foki ‘e he Hou’eiki mēmipa ‘o e kakai mo e Hou’eiki Nōpele ‘a e fokotu’u ko’eni mo hono fiema’u ke fakapa’anga ha kau loea kenau ngāue taafataha pe ki hono fale’i ‘o e Palēmia pehe ki he ngaahi ngāue fakalao kehe pe ‘a e ‘Ofisi ‘o e Palēmia.

Ko e fokotu’ut lelei pe foki ‘eni ka ‘oku anga maheni ‘aki pe foki ‘i he fa’unga ‘o e Pule’anga koe fatongia ia ‘o e Va’a Fakahinohino Lao ‘a e Pule’anga (Crown Law) pehe ki he ‘Ateni Seniale ‘a hono fale’i ‘a e Palēmia mo e Pule’anga pehē ki hono fakahoko ‘a e ngāue fakalao ‘a e ngaahi Potungāue ‘a e Pule’anga 'o kau ai hono fakafofonga'i kinautolu 'i ha fakatonutonu fakalao.

Na’e fehu’i foki ‘e Lord Nuku ‘oku matamata ‘a e fokotu’u ia ko’eni ‘o hange nai ‘e hopo pe ‘a e ‘Ofisi ia ‘o e Palēmia he ‘aho kotoa makatu'unga he lahi 'o e pa'anga 'oku fiema'u ko'eni ka na’e taukave’i foki ‘e he Minisitā Lao ‘oku fu’u fiema’u ‘eni fakatatau ki he fatongia 'o e 'Ofisi 'o e Palēmia.

‘Oku fehu’ia ‘i he taimi tatau foki ‘a e toutou me’a ‘a e Palēmia ke tuku fakatafa’aki ‘a e lao pea mo e toutou maumau lao kuo fakahoko ‘i he Pule’anga mo e fonua pea ‘oku ‘i ai ‘a e fakaukau ‘a e tokolahi na’a ko hono fakapa’anga ‘o e kau loea ko’eni ke tokoni ki he toutou hopo ‘oku hanganaki mai mei mu’a.

Kaikehe ‘oku mahu’inga foki ‘a e fakakaukau ko’eni ‘okapau ‘e ‘aonga pea tali ‘a e fale’i fakalao ‘e ‘oatu ‘e he kau loea ko’eni ki he Palēmia mo hono ‘ofisi.

‘Oku ‘uhinga pe foki ‘a e hoha’a ia ko’eni ‘o fakatatau mo e pēteni ‘o e fakahoko fatongia ‘oku fakahoko ‘i he fonua mo e lahilahi ‘a e hono tuku fakatafa’aki ‘o e lao pea kuo fakamo’oni’i ‘ene toutou hoko.

'I he taimi tatau 'oku fai 'a e ‘amanaki koe ’epoki fo’ou ‘eni pea ‘oku 'i ai 'a e fakatauange ‘e ‘aonga foki.