‘E fa’u ha lao ke tamate’i ‘a e Letiō Tonga – Palēmia ‘Akilisi Pohiva ^Featured

Na’e iku ai kene me’a’aki hangatonu ‘i he taha ‘o ‘ene fakataha Konifelenisi mo e kau Faiongoongo ‘ene ta’efiemālie ki he ‘ikai poupou ange ‘a e Letiō Tonga & Televīsone Tonga ki hono Pule’anga mo ‘enau fakahoko fatongia.

‘Oku ma’u foki ‘e he ongoongo ni ‘a e tatau ‘o e tepi ‘o e fakataha ko’eni mo e me'a 'a e Palēmia pea na’e me’a’aki ‘e he Palēmia tene fa’u ha lao ke tamate’i ‘a e Letiō Tonga & Televīsone Tonga pea ka ‘ikai pea ‘oku fakahoko e fakakaukau ke fakatau atu.

‘Oku ‘ikai foki ke ‘omai ‘ehe Palēmia ‘i he’ene fakamatala ko’eni ha ‘uhinga fakaikiiki ki he’ene ta’efiemalie ka ko’ene fakahā pe ‘oku ‘ikai poupou ange ‘a e Letiō Tonga & Televīsone Tonga ki he’ene ngāue mo e Pule’anga.

‘Oku ‘ikai foki koha ‘isiū fo’ou ‘eni ia he na’e fakahoko ‘e he Palēmia ‘i he 'aho 13 'Epeleli, 2016 ha’a ne tohi ki he ‘Eiki Minisitā ‘o e ngaahi Pisinisi ‘a e Pule’anga ‘o fokotu’u atu ke fakamalōlō’i ‘a Viola Ulakai koe faiongoono ‘a e Letiō Tonga & Televīsone Tonga ‘a ia na’a ne ta’e fiemalie ki he’ene fakahoko fatongia.

‘Oku ‘i ai foki ‘a e fifili ki he tau’atāina ‘a e ongoongo ‘o fakatatau mo e Kupu 7 ‘o e Konisitūtone ‘i he fonua ni. ‘I he taimi tatau ‘oku toe ‘i ai mo e hoha’a ki ngali 'oku pule’i faka-polisi nai 'a e ongoongo ‘o hange koia ‘oku hoko ko’eni ‘o fakatatau ki he me’a ‘a e Pālemia.

‘I he taimi tatau ‘oku te’eki ke ongona ‘e he ongoongo ni hano launga’i pe fakamaau’i ‘a e Letiō Tonga & Televīsone Tonga pea mo ‘ene kau ngāue ‘i ha Fakamaau’anga ke fakamahino ‘oku ‘i ha tu’unga fakatu’utāmaki ‘enau fakahoko fatongia ki he fonua pea ‘oku fai e fifili heni ki he tu’unga poupou ‘oku ‘uhinga kiai ‘a e Palēmia.

Na’e toki ongona pe foki ‘i he faka’osinga ‘o e mahina ko Fepueli ‘o e ta’u ni ‘a hono faka’ilonga’i fakamamani lahi ‘a e mahuinga ‘o e Letiō ki he fonua mo e kakai pea na’e ‘iai ‘a e kau CEO ‘a e Pule’anga na’a nau lea mai ‘o poupou ki he ngāue ‘a e Letiō ki he fonua koha me’a ngaue tokoni ki he ngāue ‘a e Pule’anga.

‘I ha fetu’utaki ki he Letiō Tonga na’e fakahā pe mei he ni’ihi ‘oku nau fakahoko fatongia ‘i he Letiō Tonga & Televīsone Tonga ‘oku ‘ikai kenau mahino’i pe koe hā ‘a e fehalaki ‘oku hoko he ‘oku nau fakahoko pe honau fatongia anga maheni mo tau'atāina ki he Letiō Tonga & Televīsone Tonga mo e kakai ‘o e fonua. ‘Oku mahino foki ‘a e pelepelengesi ‘a e kaveinga ni ki he kau ngāue telia ‘enau ma’u’anga ngāue he koe Poate foki ‘eni ‘a e Pule’anga.

Ko e Letiō Tonga pe foki ‘oku ne malava ke kapui ‘a e ‘otu motu katoa ‘o Tonga ni pea kapau leva ‘e hoko ‘a e fakakaukau ko’eni ‘a e Palemia ke tamate’i pea ‘oku ikai ke ilo pe koe hā ‘e hoko heni ki si’i kakai mei he ‘out motu.

Ko e Komisoni Fakamafolalea ‘a Tonga ‘oku malumalu ai ‘a e Letiō Tonga & Televīsone Tonga koe maa’imoa ia ‘a e La’a kuo Unga Fonua Kuini Sālote Tupou III pea na’e fokotu’u ‘i he taha hiva onongofulu tupu.