Ta’efiemalie ‘Etoni Afu founga ngāue ‘a e Pule’anga ki he’ene pisinisi ^Featured

Ko ‘Etoni Afu foki ‘oku kau ia he tokotaha pisinisi ‘oku ne hū lahi taha mai ‘a e fua’i’akau hangē ko e ‘apele, moli, pea, kalepi, piisi mo e kalasi kehekehe ‘o e fua’i ‘akau mei Nu’usila ki Tonga ni.

Fakatatau ki he lau ‘a ‘Etoni ‘oku ta’efiemalie lahi he ‘oku mahino mei he fakamatala kuo ‘oange kiate ia ‘e he kau ‘ofisa mei he Potungāue Fefakatau’aki ko ‘ene pisinisi, Kautaha Molisi mo e Kautaha Siaina ‘i Fasi mo e Afi kuo nau ‘osi lesisita mo laiseni kenau hū mai ‘a e fua’i’akau ki Tonga ni mo fakahoko ‘a e pisinisi natula tatau.

‘I he taimi tatau ‘oku nau totongi ‘a e pa’anga lahi ki he Potungāue Kasitomu ‘i he CT ka ‘oku ne ongo’i ‘oku ‘i ai ‘a e ni’ihi ‘oku nau fakahoko ‘a e pisinisi tatau mo kinautolu ka ‘oku ‘ikai maau ‘a ‘enau ngāue fakapepa pea ‘oku ne tui fakapapau ‘oku ‘ikai kenau totongi ha pa’anga lahi ‘i he CT he ‘oku ‘ikai mahino ‘enau ngaahi ‘inivoisi ‘oku ngaue’aki pea ta’emahino foki.

‘Oku ongo’i lahi foki ‘eni ‘e ‘Etoni ‘o fakatatau ki he’ene fakamatala he ‘oku mark-up tatau pe ‘a e totongi ‘o ‘ene fua’i ‘akau mo kinautolu ka ‘oku ne ‘ilo pau ‘oku ‘ikai kenau fou ‘i he founga totonu. Na’a ne toe fakahā foki kuo fakamatala tonu ange kiate ia ‘e he kau ‘ofisa mei he Potungāue Fefakatau’aki ‘oku ‘ikai ha pepa ‘a e kakai koia pea ‘oku ne tui ta’e toe veiveiua ‘oku ‘ikai palanisi ‘a e founga pisinisi he ‘oku fou ia he founga pea ne fua mo hono kavenga fakapa’anga ka e tukuange ‘a e ni’ihi ia ke fa’ifa’iteliha pe.

‘I he fakamatala ‘a ‘Etoni ‘oku ne tukuaki’i ‘a e ‘ikai maau ‘a e founga ngāue ‘a e Pule’anga ki he ngaahi pisinisi ko’eni ‘o kau ai ‘a e fa’ahinga pisinisi ‘oku ne fakahoko he ko e ta’u lahi ‘eni mo e kei palopalema pe. “’Oku fakaholomui ‘aupito ‘eni kiate au pea ko hono mo’oni ‘oku ma’u ‘eku mo’ui he fa’ahinga pisinisi ko’eni ‘oku ou fakahoko pea taimi tatau ‘oku tanaki tukuhau mei ai ‘a e Pule’anga ‘o lelei ki he ‘ikonomika ‘o e fonua”, ko e konga ia ‘o e fakamatala ‘a ‘Etoni.

‘Oku hū mai foki ‘e ‘Etoni Afu ‘a e meimei koniteina fua’i’akau ‘e 2 he uike kotoa tukukehe ange ‘a e ngaahi taimi konifelenisi mo e ngaahi katoanga lalahi ‘a ia ‘oku toe lahi ange ia. ‘I he taimi tatau ‘oku mahino ki he ongoongo ni ‘a e manakoa ‘a e pisinisi ko’eni ‘a ‘Etoni he kuo lau ta’u ‘a e ‘ene fakahoko ‘a e ngāue ni.

Na’e ‘oatu foki ‘e he ongoongo ni ‘i he mahina ko Fepueli ‘o e ta’u ni ‘a hono faka’ikai’i mamafa ‘e ‘Etoni Afu ‘a e tukuaki’i ‘e he Fale Alea ‘oku ‘ikai ke tute hono hū mai ‘a e fua’i ‘akau kae kei mamafa pe hono fakatau atu ki he kau kasitoma mo e kakai 'o e fonua. Na'e fakamahino foki ‘e ‘Etoni neongo ‘oku to’o ‘a e tute ka ‘oku nau kei totongi pe ‘a e CT ‘a ia ‘oku ‘avalisi ki he TOP $6000 ki he koniteina pea ko e pa’anga lahi ‘a e fonua ‘oku tanaki mei ai.

‘Oku faka’amu foki ‘a ‘Etoni ke fakalelei’i ‘e he Pule’anga ‘ene fakahoko fatongia fekau’aki mo’ene ta’efiemalie pea kenau fengāue’aki fakataha tautautefito ki he Potungāue Kasitomu mo e Potungāue Fefakatau’aki he ‘oku fua ‘e he ni’ihi ‘oku muimui ki he lao ‘a e kavenga fakapa’anga ‘o e fa’ahinga pisinisi ko’eni ka e ‘ai’ainoa’ia ‘a e ni’ihi pea nau toe fakatau atu pe he totongi tatau.

“‘Oku ‘ikai keu tui koha launga ‘eni pe tukuhifo ka ko ‘eku fakahoko ‘a e fatongia totonu mo ‘oatu ‘eku hoha’a ki he kau ma’u mafai fekau’aki mo e tafa’aki ‘oku totonu ke fakalelei’i he 'e lelei kia kimautolu matu'a 'oku ngaue he tafa'aki ko'eni, Pule'anga mo e fakalukufua ‘a e fonua", ko e faka'osi mai ia 'a 'Etoni.