Foaki Siaina Pa’anga 1 miliona tupu tokoni ki he fakaakeake Saikolone Gita Featured
Palēmia ‘o Tonga ‘Akilisi Pohiva mo e ‘Amipasitoa 'a Siaina ki Tonga Wang Baodong
17 Fepueli, 2018. Kuo foaki ‘e he Pue’anga Siaina ‘o fakafou mai ‘i he'enau ‘Amipasitoa ki Tonga Wang Baodong ha pa’anga e 500,000-00 ‘Amelika ‘a ia ‘oku fakafuofua ia ki he pa’anga ‘e 1.3 Tonga miliona koe tokoni ki he fakaakeake ‘a e fonua mei he saikolone ko Gita.
Na’e foaki foki ‘a e tokoni ko’eni ‘e he ‘Amipasitoa Siaina ki he Palēmia ‘o Tonga ‘Akilisi Pohiva mo fakahoko ai pe ‘a e popoaki mei he Minisitā ki Muli ‘a Siaina Wang Yi mo e fie kaungāmamahi ‘a hono fonua ki he taufa kuo tō ‘i Tongatapu.
Na’e toe foaki foki ‘e he Kautaha Kolosi Kula ‘a Siaina ha pa’anga ‘e 100,000-00 ‘Amelika ki he Kautaha Kolosi Kula ‘a Tonga koe tokoni ai pe ki he fakaakeake mei he saikolone ko Gita.
‘I he taimi tatau na’e toe foaki ai pe mei he ‘Ofisi ‘Amipasitoa Siaina ‘i Tonga ‘a e pa’anga ‘e 40,000-00 koe tokoni ai pe ki he fakaakeake ‘a e fonua.
Na’e fakamālō’ia ‘e he Palēmia ‘a e tokoni ko’eni ‘a e Pule’anga Siaina mo e hounga’ia ‘a e fonua ‘i he fu’u tokoni lahi kuo fakahoko ki he fonua.
