Fiema’u ha liliu ki he Fakamaau’anga: Minisitā Lao Vuna Faka’otusia Featured
Minisitā Lao Sione Vuna Faka’otusia
23 ‘Aokosi, 2017. Kuo fakahā ‘e he Minisitā Lao Sione Vuna Faka’otusia ki he ngaahi kautaha ongoongo ‘oku ne tui ‘oku fiema’u ha tokotaha Tonga ke hoko koha Fakamaau Lahi.
‘I hano faka’eke’eke ‘o Faka’otusia ‘e he ongoongo ‘a e Letiō Tonga na’a ne fakahā ai ‘oku tokolahi ‘a e kau loea kei ta’u iiki pea tenau malava kenau ngāue ‘o kamata mei he Fakamaau’anga Polisi ‘o ‘alu ai pe ki he Fakamaau’anga Lahi.
Na’a ne toe me’a foki ‘oku fiema’u ke fokotu’u leva moha Fakamaau’anga ki he fanau iiki (juvenile court) he ‘oku lahi ‘a e ngaahi keisi ‘a e fanau iiki ka ‘oku toutou tautoloi pea ‘oku fiema’u ha Fakamaau’anga makehe ia kiai.
Na’e fakamahino ‘e Faka’otusia na’e folau ‘a e Tu’i Fakamaau Lahi Owen Paulsen ki Nu’usila pea na’e fai ‘a e vakai ki he kaveinga ni pea ‘oku ‘i ai ‘a e ‘amanaki ‘e fakahoko leva ha ngaue kiai.
Ko e kaveinga foki ko’eni na’e toutou ‘ohake pe ki mu’a ka ‘oku ‘i ai ‘a e tui ko’ene hoko atu ‘eni ke mo’oni ‘a e misi ko’eni.
