Si'i Teiko ^Featured

Fakafatu mo fakafasi/fakaafo ‘ehe punake ta‘e‘iloa

‘Oku tukupā ‘a e ‘atikolo ni ma‘ae si‘i kau pekia kotoa he mole ‘a e MV Teiko, ‘o nau kelekele’aki ‘a e moana loloto, vavale mo ta‘e‘iloa kuo hoko ko si‘onau fonualoto moe fa‘itoka.

1. Nofo ā Fangatapu moe Hala Uafu
Kau ‘alu ‘o hēvaha ‘ihe vahafolau
Keu kumi si‘ono kakala fakatalutalu
Ola ‘oe maa‘imoa ma‘ae kaha ‘u

2. ‘E Paluki Matahiva moe ‘Otu Ha‘apai
‘E Velata moe Sī pea mo Ikalahi
Koe ‘ofa ‘eni kei talifaki
Ko ho‘o tōtau tala pea ngali

3. ‘E Pangai Fo‘ou pea mo Nuana
Ke mo nofo kae tuku keu ‘alu ‘o hēvaha
Keu ui si‘i hingoa he loto moana
Si‘i Viliami Filipe moe kau tangata

Tau: Si‘i Teiko koe moto ‘oe lolotonga
Si‘i manumanumelie ‘o Loto Nuku‘alofa
Kuo siu mānoa ‘ihe ta‘e‘iloa
Ka kuo te si‘i nofo mo e hau‘alofa

KI‘I FAKAMATALA NOUNOU

‘Oku mahino mai ko e ta‘anga tengihia mālie ni na‘e fatu ki he mole ‘a e vaka toutai ‘o e Pule‘anga Tonga ko e MV Teiko. ‘Oku hohoamālie ‘a e ta‘anga pē maau mo e afo pē fasi fakatoulōua, ‘aia ‘oku ‘ikai ngata pē he‘ena mālie ka ‘oku na toe fakamamahi mo fakaloloma foki. ‘Oku ngāue‘aki ‘ehe pulotu fa‘u ‘a e heliaki fakafetongiaki mo e heliaki fakafekauaki mo e pulotu hiva pē fasi ‘a e liliu fasi, ‘o kehekehe ‘a e afo ‘oe ngaahi kupu mo e tau. ‘E lau ‘ehe Nepituno ko e koloa hulu ka ma‘u ha tala fungani fekau‘aki mo e punake [pulotu fa‘u pē pulotu hiva pē fasi] na‘a ne fakafatu pē mo fakafasi pē fakaafo fakatoulōua ‘a e ta‘anga pē maau moe hiva, ta‘u na‘e mole ai moe hingoa ‘o e kau pekia, fakatou‘osi ‘a e kau toutaivaka moe kau toutaiika kotoa.  ‘Ihe ‘ofa fau moe manatu atu.