Toe faka'ilo 'e Robyn Tu’ivakano ‘a Samuela ‘Akilisi Pohiva mo e Letio 87.5 ki he lau'ikovi'i Featured
Lady Robyn Tu'ivakano pea mo Lord Tu'ivakano 'a ia na'e fai hono lau'ikovi'i
26 Tisema, 2017. Kuo fakapapau'i mai 'e he loea 'a Lady Robyn Tu’ivakano William Clive Edwards kuo toe faka’ilo ‘e Lady Tu’ivakano koe hoa 'o e Sea Malōlō ‘o e Fale Alea ‘o Tonga Lord Tu'ivakano ‘a Samuela ‘Akilisi Pohiva pehe ki he Letio 87.5 ‘a Katalina Tohi ki he fakalotokovi mo e lau’ikovi’i.
Ko e faka’ilo lau’ikovi’i foki ‘eni fekau’aki mo e ngaahi lea ‘a ‘Akilisi Pohiva lolotonga ‘a e kemipeini ‘a e Paati PTOA ki he fili Fale Alea ‘o e ‘aho 16 ‘o Nōvema ‘a ia na’e tukuaki’i ai tokua ‘e Pohiva mo e PTOA ‘a e Sea ‘o e Fale Alea Lord Tu’ivakano mo hono hoa ‘oku na kau atu ki hono fe’ave’aki ‘a e pa’anga ‘uli ki muli (money laundering).
Na'e 'osi faka'ilo foki 'e Lord Tu'ivakano 'a e ongo Faka'iloa tatau 'i he uike kuo maliu atu ka ko'eni kuo toe kau atu mo Lady Tu'ivakano 'i hono faka'ilo 'a e ongo Faka'iloa.
Ko e lea foki ‘eni na’e fakahoko ‘i he po’uli ‘o e ‘aho Tusite 17 ‘o ‘Okatopa ‘i he Holo Hoositea ‘i Fua’amotu lolotonga ‘a e kemipeini ‘a e Paati PTOA ma’a Penisimani Fifita pea na’e fakamafola fakahangatonu ‘i he letio 87.5 ‘a Katalina Tohi ‘a ia koe memipa pe moia ‘o e PTOA.
Na'e 'ikai foki ke ngata pe 'a e lau'ikovi'i ko'eni 'ia Lord Tu'ivakano kae na'e toe fakakau atu kiai mo hono hoa Lady Robyn Tu'ivakano 'o tukuaki'i tokua 'oku nau kau ki he lisi ‘o e toko 14 na’e ma’u mei he Pangikē Pule ‘oku nau kau atu ki he ‘ave pa’anga lalahi ki muli pea ko e pa'anga 'uli.
Ko e lisi koia 'oku pehe koe ma'u mei he Pangike Pule kuo 'osi paaki mai 'e he Nusipepa “Talaki” Voliume 14 Fika 701 ‘o e ‘aho Tusite 7 ‘o Novema 2017 pehe ki he Ongoongo 'i he ngaluope 'a e Kaniva 'o he 'aho.
'Oku fehu'ia mamafa foki 'e Edwards loea 'a Lady Tu'ivakano 'a ia 'oku ne toe fakafofonga'i 'a Lord Tu'ivakano 'a e tu'unga fakalao hono tukuange 'o e lisi ko'eni he 'oku 'ikai ngofua 'i he lao 'eni pea 'oku lolotonga fakahoko 'a e ngaue kiai.
‘Oku mahino pe foki ia kuo pau ke lekooti ‘e he Pangikē Pule ia ‘a e kau ‘ave pa’anga lalahi ki muli ka ‘oku ‘ikai ‘uhinga ia ‘oku hoko hano ‘ave ‘a e pa’anga ‘uli pe koe money laundering hange koia koe tukuaki’i ‘a Pohiva mo e PTOA pea 'oku te'eki ke faka'ilo pe ta'ofi 'e he Pangikē Pule 'a e fe'ave'aki pa'anga ko'eni he 'oku 'i ai hono lao mo hono tu'utu'uni.
'I he fakamatala 'a Edwards 'oku lahi 'a e ngaahi fakatonutonu fakalao fekau'aki mo e lau'ikovi'i ko'eni 'a ia na'e fakataumu'a faka-kemipeini ki he fili Fale Alea kuo tau situ'a kiai ke tohoaki'i 'a e loto 'o e kakai pea kuo maumau ai 'a e ongoongo 'o e kau ma'u tu'unga mo e kakai tokolahi 'a ia 'oku 'uhinga ai 'a e fakatonutonu ko'eni.
