Fakatotolo Potungāue Polisi ki he ngaahi fakamo’oni Tohi Tangi ki he Fale Alea fekau’aki mo e Kōvana Pangikē Pule ^Featured

‘Oku ‘ikai fo’ou foki ‘a e ngaahi tohi tangi kuo fakahū ki he Fale Alea ‘o Tonga ka ‘oku mahino mai ‘a e matavaivai ‘a hono fakahoko ha ngāue ki he tu’unga mo’oni mo fakalao ‘a e ngaahi fakamo’oni ‘oku hā he ngaahi tohi tangi ko’eni.

‘Oku ‘ikai foki koe tohi tangi pe ko’eni fekau’aki mo Dr. Kioa ka ‘oku lahi mo e ngaahi tohi tangi kimu’a ‘oku fehu’ia ‘a e tu’unga ‘o e ngaahi fakamo’oni pea moe kakai na'a nau fakamo’oni kiai ka na’e te’eki fakahoko ha ngāue kiai ‘a e Potungāue Polisi.

‘I he taimi tatau ‘oku mahino mai foki mei he tohi tangi fekau’aki mo Dr. Kioa ‘a e faka’ikai’i ‘e he tokolahi na’e ‘ikai kenau fakamo’oni ki he tohi tangi ko’eni. ‘Oku fakaofo foki he ko e konga ‘o e famili ofi, kaungame’a ‘o Dr. Kioa mo hono famili ‘o kau ai mo hono foha na’a kau kau ki he fakamo’oni ta'e 'iai ha'anau 'ilo kiai.

‘Oku makatu’unga leva mei heni ‘a e hu’uhu’u ‘o iku fakahoko ai ‘e he e Potungāue Polisi ‘a e ngāue ki he tohi tangi ko’eni.

‘I he taimi tatau ‘oku ‘i ai ‘a e fiema’u lahi ke fakamalohi’i ‘a e founga ‘oku sivi ‘aki ‘a e ngaahi tohi tangi he ‘oku ‘uluaki tukuange mai foki ia ‘i he Fale Alea ‘o Tonga ‘o fanongo kiai ‘a e fonua lolotonga ia ‘oku 'ikai mahino 'a e tu'unga fakalao 'o e ngaahi fakamo’oni pea iku ki he ngāue kiai ‘a e Potungāue Polisi.

Kuo fakahā foki ‘e he taha ‘o e kau loea ‘o e fonua na’e a’u ange kiai ‘a e Potungāue Polisi ke hiki ha’ane fakamatala fekau’aki mo e hā hono hingoa ‘i he tohi tangi ko’eni ka na’e ‘ikai ke kau ia ki he fakamo’oni.

Lolotonga 'eni 'oku fakahoko foki ‘a e ngāue ki he kaveinga ni ‘e he Potungāue Polisi pea ‘oku toutou ‘o hake pe foki ‘i he feme’a’aki ‘a e Fale Alea ‘a e mahu’inga ke fakapapau’i ‘a e ngaahi me’a ‘oku hū ki he Fale Alea mo fakamafola mei ai.

‘Oku ‘i ai ‘a e totonu mavahe mo e monu’ia (Parliamentary Priviledges) ‘a e Hou’eiki Memipa kenau lave natula tukuaki’i mo lea fekau’aki moha taha ka ‘oku ‘ikai ‘oange ha faingamalie pe totonu ki he taha koia ke ‘omai ha’a ne tali he ‘oku ‘ikai kene kau ki he Fale Alea.

'I he'ene pehe leva 'oku 'ikai ha faingamalie 'o Dr. Kioa ke 'oatu ha'ane tali pea 'ikai mahino pe 'oku mo'oni 'a hono tukuaki'i pe 'ikai. ‘Oku muimui’i foki ‘e he ongoongo ko’eni ‘a e kaveinga ko’eni.