Tautea ngāue pōpula kae toloi toko 6 Georgia na’e hū mai ki Tonga ni ngāue’aki paasipooti loi Featured
Koe toko 6 Georgia 'eni 'oku lolotonga tauhi fakalao 'i tu'a 'i he Fakamaau'anga. Faitaa 'ae Televisone/Letiō Tonga
26 'Okatopa, 2016. Na’e tautea ngāue pōpula taki ta’u 2 kae toloi ‘a e toko 6 Georgia na’e hū ta’efakalao mai ki Tonga ni ‘o ngāue’aki ‘a e paasipooti loi he pongipongi ‘o e ‘aho ni.
Ko e toko ono foki ko’eni na’a nau hū mai ki Tonga ni ‘i he ‘aho 22 ‘o Sepitema ‘aki ‘a e ngaahi paasipooti Kalisi (Creece) ‘a ia na’e kaiha’asi pea liliu mo e ngaahi hingoa kenau ngāue’aki.
Ko e hū mai foki ‘a e toko ono ko’eni ‘o taumu’a kenau folau ki Nu’usil hili ia ‘enau folau holo he ngaahi fonua kehekehe pea nau toki fou mai ‘o puke kinautolu ‘i Tonga ni.
Na’e tauhi fakalao foki kinautolu ‘i Tonga ni kimu’a pea nau hā ‘i he Fakamaau’anga Lahi he pongipongi ‘o e ‘aho ni.
Fakatatau ki he fakamatala 'a e ongoongo 'a e Letiō Tonga, na’e tautea kinautolu 'i he Fakamaau'anga Lahi kenau ngāue pōpula taki ta’u 2 kae toloi pea nau totongi ‘a e taki pa’anga ‘e 1000 TOP ki he Fakamaau’anga.
Na’e fakafofonga’i foki ‘a e toko 6 ko’eni ‘e Laki Niua pea ko e ‘Ofisi leva ‘o e ‘Ateni Seniale ma’ae Kalauni.
Na'e toe tu'utu'uni foki ke mavahe ‘a e toko 6 ko’eni mei Tonga ni 'i loto he uike 'e 2.
