Tautea ngāue pōpula mahina 18 ‘a e ‘Ikale Tahi Tutuku ko Kusitafu Tonga ^Featured

Ko hono tautea ‘eni ‘o Tonga ki he ‘ene ngāuehala ‘aki ‘a e falalala mo e pa’anga pea ‘ikai kene fakahoko ‘a e aleapau mo e Potungāue Pilīsone ‘a ia na’e ‘oanga kiate ia ‘e he Potungāue ni ‘a e pa’anga Tonga ‘e 165,000 kene hūmai ‘a e ngaahi me’a lele ma’a e Potungāue ni.

Na’e ‘ikai foki ke fakahoko ‘e Tonga ‘a e aleapau ko’eni ‘a ia na’e talu hono ‘oange kiate ia ‘a e pa’anga ‘i he ta’u 2008 pea koe ta’u ‘eni ‘e 9 mei ai koe toki fakakakato 'eni 'a e fakatonutonu ko'eni. Na’e pau ai ke fakahoko ‘a hono faka’ilo hia ‘e he Potungāue mo e Pule’anga ‘a Tonga ‘o makatu’unga mei ai hono fakahoko ‘o e hopo ni.

Na’e ‘uluaki fakahoko foki ‘e he Potungāue Pilisone mo e Pule'anga ‘a e ‘eke sivile 'i loto he ta'u 'e 9 ko'eni  pea hoko mai ‘eni ki hono faka’ilo hia ‘o Tonga. Ko e tautea ko’eni ‘o Tonga ‘oku makatu’unga kotoa ia ‘i he’ene mamau’i ‘a e aleapu ko’eni pea mo e mole ‘a e pa’anga ‘a e Potungāue mo e Pule’anga.

Kuo fakahā ‘e he loea ‘a Tonga William Clive Edwards ki he ongoongo ni ‘e fakahoko ha tangi ‘a Tonga fekau’aki mo e tautea ko’eni.

Na’e tauhi ai pe ‘e he kau Polisi ‘a Tonga hili ‘a e tala tu’utu’uni ‘o e hopo ni ‘o kamatai ai pe ‘a e fakahoko hono tautea ‘i he ‘aho Tu’apulelulu 21 ‘o Siulai.

Ko Kusitafu Tonga foki kuo ne ‘osi fakafofonga’i tu’o lahi ‘a e fonua ‘i he Timi ‘Ikale Tahi ki mu’a pea ne hoko ko e tangata pisinisi fakatau me’alele mo hū me’alele mai ki Tonga ni.