Tautea ngāue pōpula mahina 18 ‘a e ‘Ikale Tahi Tutuku ko Kusitafu Tonga Featured
Nuku’alofa, 24 Siulai 2016. Na’e tautea ‘i he Fakamaau’anga Lahi ‘e he Fakamaau Lahi ko Cato ‘i he ‘aho Tu’apuleulu 21 ‘o Siulai ke ngāue pōpula mahina ‘e 18 ‘a e tangata pisinisi ko Kusitafu Tonga ‘o Fasi mo e Afi.
Na’e ‘ikai foki ke fakahoko ‘e Tonga ‘a e aleapau ko’eni ‘a ia na’e talu hono ‘oange kiate ia ‘a e pa’anga ‘i he ta’u 2008 pea koe ta’u ‘eni ‘e 9 mei ai koe toki fakakakato 'eni 'a e fakatonutonu ko'eni. Na’e pau ai ke fakahoko ‘a hono faka’ilo hia ‘e he Potungāue mo e Pule’anga ‘a Tonga ‘o makatu’unga mei ai hono fakahoko ‘o e hopo ni.
Na’e ‘uluaki fakahoko foki ‘e he Potungāue Pilisone mo e Pule'anga ‘a e ‘eke sivile 'i loto he ta'u 'e 9 ko'eni pea hoko mai ‘eni ki hono faka’ilo hia ‘o Tonga. Ko e tautea ko’eni ‘o Tonga ‘oku makatu’unga kotoa ia ‘i he’ene mamau’i ‘a e aleapu ko’eni pea mo e mole ‘a e pa’anga ‘a e Potungāue mo e Pule’anga.
Kuo fakahā ‘e he loea ‘a Tonga William Clive Edwards ki he ongoongo ni ‘e fakahoko ha tangi ‘a Tonga fekau’aki mo e tautea ko’eni.
Na’e tauhi ai pe ‘e he kau Polisi ‘a Tonga hili ‘a e tala tu’utu’uni ‘o e hopo ni ‘o kamatai ai pe ‘a e fakahoko hono tautea ‘i he ‘aho Tu’apulelulu 21 ‘o Siulai.
Ko Kusitafu Tonga foki kuo ne ‘osi fakafofonga’i tu’o lahi ‘a e fonua ‘i he Timi ‘Ikale Tahi ki mu’a pea ne hoko ko e tangata pisinisi fakatau me’alele mo hū me’alele mai ki Tonga ni.
2 comments
-
"Ofa atu Kusitafu pea koe a nga ia e fononga kuo pau pe ke 'i ai hono ngaahi fakafele'au ka 'oku tau ako mei ai pea hoko atu e mo'ui ia he ko mamani 'eni.
-
Lava atu a Kusitafu o ngaue'i e kii mahina nounou koena. Na ke pehee teke ta'efai ki hoomou alea e alu kife kakava oe fuupaanga koena. Pea oku ikai koe mea pe ena oku ke moua kiai oku fele moe ngaahi mamahi kehe. Laka lelei o ngaue'i ke huhu'i e mamahi kehekehe.