Hiki Totongi Kava Tonga Featured
Nuku’alofa, 2 Novema 2015. Kuo a’u mai ‘eni ki he tu’unga kuo hiki ‘a e totongi ‘o e kava Tonga ‘i he maketi pea ‘oku ‘i ai ‘a e faka’ilonga ‘e honge kava ‘a e fonua ‘i he a’u mai ki he ngaahi mahina si’i ko’eni kuo tau situ’a kiai.
Ko e totongi angamaheni ‘o e Kava Tonga na’e nofo ‘i he $20 ki ke $25 ki he kilo ka ko’eni kuo a’u ki he $30 ki he $40 ki he kilo.
Ko e fua momoa leva kuo a’u ‘eni ki he $19 ki he kilo ‘a ia ko’ene hiki ia mei he $12 he tu’unga anga maheni na’e ‘i ai. ‘Oku kau foki ‘eni ia he monū ki he kau tō ngoue kava pea na’e fuloa mai pe foki ‘a e tō lalo ‘a e tu’unga totongi ia ‘o e kava ‘o fakatatau ki he lahi ‘a e ngāue mo e fakamole ‘oku fakahoko kiai.
‘Oku mahino mai koe taha ‘o e ‘uhinga ‘o e hiki ko’eni ‘o e totongi ‘o e kava he maketi ko hono fakaava mai koia ‘a e maketi mei Siamane mo ‘Iulope ‘a ia ‘oku ‘i ai ‘a e fiema’u kava mei ai pea ‘oku takimu’a ‘a e tangata pisinisi kava ‘iloa koia ko To’imoana Takataka ‘i hono fua momoa mo fakatau lahi mai ko’eni ‘o e kava ke fakakakato ‘a e fiema’u ‘a e maketi mei ‘Iulope.
Ko e vahefonua Vava’u foki mo ‘Eua ‘oku lahi ai ‘a e kava pea ‘oku fiefia lahi foki ‘a e kau ngoue to kava ‘i he hiki ko’eni ‘a e tototongi ‘o e kava ka ‘i he taimi tatau ‘oku ongo ‘eni ki he kau inu kava ‘o e fonua ‘a ia ‘oku pau ke toe fai hano fakakaukau’i ‘a e totongi ‘o e holo pe koe fea ‘i he ngaahi kalapu kava Tonga ‘a ia ‘oku kei tu’uma’u pe ‘i he $5.
‘Oku kau foki ‘a e kava Tonga he ma’u’anga pa’anga tefito ‘a e kau ngoue ‘o tautautefito ki he Vahefonua Vava’u mo ‘Eua.
