Kei hokohoko atu pe honge Kava Tonga ^Featured

Na’e talu foki ‘a e kamata mai mei he faka’osinga ‘o e ta’u 2015 ‘o a’u mai ki he ta’u ni mo e mahino mai ‘oku honge kava Tonga ‘a e fonua pea mahino mo e hiki peseti ‘e 100% ‘a e totongi mei he angamaheni ‘i he ta’u ‘e 10 kuo tau situ’a kiai.

Kuo a’u foki ‘a e totongi ‘o e kava ki he pa’anga ‘e $60 ki he kilo pea a’u mo e totongi hono fua momoa ‘o e kava te’eki tuki ki he $38 ki he kilo ‘a ia ko e hiki lahi faka’ulia ‘eni ‘o fakatatau ki he tu’unga anga maheni na’e ‘i ai ‘a e maketi ‘o e kava Tonga he kuohili ‘a ia na’e pa’anga ‘e $25 ki he kilo ‘a e kava efuefu pea pa’anga ‘e $10 ki he $15 ‘a hono fua ‘o e kilo kava momoa te’eki ke tuki.

‘Oku natula tatau foki ‘a e fakamatala ‘a e kau tō kava ‘o e vahefonua Vava’u ‘i he’enau fakaha ko e tupu ‘a e honge kava mei he la’ala’a ‘a e fonua he ngaahi ta’u si’i kuo tau situ’a kiai. ‘Ikai ngata ai na’e hoko ‘a e ‘ikai lelei ‘a e totongi mo e falati ‘a e maketi ke lotosi’i ai ‘a e kau tō kava Tonga ‘o ‘ikai lahi pe toe tō ha kava pea ‘oku kaunga lahi ia ki he honge ko’eni.

Kuo hoko foki ‘a e kava Tonga mo hono tu’unga faka-maketi he ngaahi ‘aho ni ko e koula mo’oni pea ‘oku ki’i lahilahi foki mo e alaalanoa ‘a e ni’ihi na’e ‘ikai to kava. ‘Oku mahino mai foki ‘oku hoko ‘a e honge ko’eni ke mafana ‘a e tokolahi ‘o toe tō kava ka ‘oku mahino pe foki ia ‘e toki ‘aonga ‘eni kiha ta’u ‘e 3 pe 4 ka hoko mai.

‘Oku vava mai foki ‘i he taimi tatau moe ngaahi maketi kihotau kainga muli pea kuo ma’u mo e fakamatala mei he ‘Ofisi ‘o e ‘Amipasitoa Tonga ‘i Siaina ‘oku ‘i ai ‘a e amanaki lelei ki he ngaahi alealea ki ha maketi ‘o e kava Tonga ki Siaina.