Ikuna 'e Junior Fa 'ene fuhu hono 16 te'eki fo'i Featured
Junior Fa 'i he'ene tuki pohu 'a Rogelio Omar Rossi.
17 Tisema, 2018. Kuo ikuna 'e he matapule Tonga ko Junior Fa 'o Ha'alaufuli Vava'u ka 'oku ne fuhu polofesinale 'i Nu'usila 'ene fuhu hono 16 'aki 'ene tamate'i 'a e matapule 'Asenitina ko Rogelio Omar Rossi 'i he sekoni pe 'e 90 'o e 'uluaki takai.
Ko e fuhu foki ko'eni na'e fakahoko ia ki Christchurch 'i he po Tokonaki 15 'o Tisema ni 'a ia ko e Tokonaki ia ko'eni kuo tau situ'a kiai.
Na'e fakahoko 'a e fuhu ko'eni ki mu'a pea fuhu lahi 'a Joseph Parker 'o Nu;usila koe hau malolo 'i he WBO mo Alexander Flores 'a ia na'e ikuna tamate'i pe 'e Parker 'a e matapule ni.
Ko e fuhu 'aki foki 'eni 'a Fa hono 16 pea kuo ne ikuna katoa 'ene ngaahi fuhu ko'eni 'a ia 'oku kau 'eni he lekooti lelei.
Na'e fakaha foki 'e Fa ki he ngaahi kautaha ongoongo 'oku ne mateuteu ke fuhu mo Joseph Parker 'i ha fa'ahinga taimi.
Na'e toe fakaha foki 'e pule 'o Fa ko Mark Keddell 'oku fakahoko hano ale'i ha fuhu 'a Fa ki he ta'u kaha'u pea ko e fuhu koia e fakamahino ai 'e Fa ki mamani hono tu'unga.
