“ 'Oku fai 'ae fakamalo lahi 'oe lava lelei moe ola mo'oni hono fili 'ae palemia fo'ou 'o Tonga, 'o hoko ai 'a 'Eiki Faifekau Dr Pohiva Tui'onetoa kihe tu'unga ma'uhinga kae faingata'a koe Palemia 'oe 'Otu Tonga. 'Oku 'iai 'ae fiefia atu he 'atamai moe mafana fau he loto koe fokotu'utu'u fo'ou kuo ne fai hono fili 'ae kapineti mo hono kau minisita, 'aia 'oku tuha, taau mo fe'unga ('ae tokolahi taha) moe ngaahi fatongia moe ngafa mamafa lahi kae toe faingata'a foki. 'Oku hanga 'ehe fokotu'utu'u fo'ou ko 'eni 'o tala 'ae fakatu'utamaki 'oe fa'unga fakapaati fakapolitikale (ngalingali ta'efakakonisitutne mo ta'efakalao) na'e kamata 'ehe PTOA. Na'e mafaimafai 'ae PTOA hono 'ave hala 'ae fakafa'afa'ahi fakapaati fakapolitikale 'o nau ui ai 'ae Fa'ahi Tau'ataina tokua mei he toenga 'oe Kau Fakafofonga Falealea 'oe Kakai moe Fa'ahi Nopele mei he kotoa 'ae Kau Fakafofonga Falealea 'oe kau noplele. 'Oku malie 'ae fokotu'utu'u fo'ou ko 'eni he 'uhinga 'oku faka'ahiua (2) pe 'ae Falealea koe Kau Nopele moe Kakai 'oku nau ngaue fakataha kotoa pe ma'ae lelei fakalukufua 'ae fonua moe kakai hono fili ha palemia moha kau minisita 'oe kapineti 'o Fa'ahi Pule'anga pea fakataha leva 'ae toenga 'o tatau 'ae kau nople moe kakai koe Fa'ahi Fakaanga. 'Oku nau toki ngaue kotoa leva he'enau kehekehe he laumalie 'ofafonua kihe lelei fakalukufua mo fakakatoi 'ae fonua moe kakai. 'Oku fe'unga ange 'eni mo hotau lahi/si'i moe tokolahi/tokosi'i kae 'ikai koe fakafa'afa'ahi fakapaati fakapolitikale 'oku 'ikai ngata pe he'ene fakatu'utamaki kae toe felekeu mo ta'emaau foki! ”