Hoko ‘a Laki Niu koe fuofua Fakamaau Lahi Tonga Featured
Laki Niu SC
26 Sune, 2018. Kuo tali ‘e he Penolo ‘oku nau fili ‘a e kau Fakamaau Lahi ‘i he malumalu ‘o e Fakataha Tokoni ke fokotu’u ‘a Laki Niu ‘o Nukunuku ke hono ko e fuofua Fakamaau Lahi Tonga ia ‘i he fonua.
Na’e tu’uaki foki ‘a e lakanga ni ‘o fakatatau mo e tu’utu’u ni ngaue mo e Lao ki hono fili ‘o e kau Fakamaau Lahi pea iku ai ki hono fili ‘a Niu ki he Lakanga ni.
Ko e lakanga faka-hisitolia foki ‘eni ki he fonua mo e fuofua a’u ‘eni ha Tonga ki he lakanga Fakamaau Lahi.
Ko Laki Niu foki koe Loea Ma’olunga (Senior Counsel SC) pea kuo fuoloa ta’u ‘ene ngaue faka-lao pehe foki ki he’ene taukei faka-lao ‘i he fonua.
Na’e ‘osi hoko foki koe Fakafofonga Fale Alea ma’a e vahenga Tongatapu ‘i he ngaahi ta’u kuo maliu atu tukukehe ange 'ene ngaahi taukei 'i he tapa kehekehe 'o e mo'ui.
Ko Laki Niu foki kuo ‘osi ma’u hono faka’ilonga LLB mei he ‘Univesiti ‘Aokalani pea 'e kamata ngaue ki he lakanga fo'ou ko'eni 'i he 'aho Monite 2 Siulai 2018.
