Feinga nai ke 'ufi'ufi'i 'a e ngaue pango 'i he lingi'anga veve Kalaka? Featured
9 Sune, 2018. 'Oku ma'u 'e he ongoongo ni 'a e ngaahi 'ata 'o tukuaki'i koe feinga 'a e ma'u mafai ke 'ufi'ufi 'a e ngaahi ngaue ta'efakapotopoto 'oku fakahoko ki he lingi'anga veve ko Kalaka.
Na'e 'oatu foki 'e he ongoongo ni 'i he ngaahi uike kuo maliu atu 'a e ngaahi 'ata 'a e ngaue lingi veve ki he lingi'anga veve Kalaka 'i Okoa Vava'u pea 'oku 'i ai 'a e tui 'oku 'ikai fakapotopoto he 'oku uesia lahi heni 'a e 'atakai mo e nofo 'a e kainga.
Na'e toe ma'u foki 'a e ngaahi 'ata 'o mahino mai 'oku ngali ko e feinga 'a e ma'u mafai ke 'ufi'ufi 'a e ngaue pango ko'eni 'aki hano tanu kelekele ke pulia 'a e ngaahi lingiveve na'e fakahoko' 'i he 'elia 'o e lingi'anga veve ni 'o kau ai mo hono tukuange ai 'a e veve sepitiki 'a ia 'oku fu'u ofi ki tahi pea 'oku 'ikai ke puli 'oku uesia heni 'a e ma'u'anga mo'ui 'a e kainga 'oku nofo atu he 'elia ko'eni ai.
Na'e a'u tonu 'a e ongoongo ni 'o vakai ki he lingi'anga veve 'i Kalaka pea 'oku 'ikai ke puli ia 'oku 'i ai 'a e uesia 'o tatau pe he taimi nounou mo'ene tu'u ki he kaha'u.
Na'e fai mo hano faka'eke'eke 'a e ni'ihi mei he ngaahi kolo ofi 'i he 'elia ko'eni pea na'a nau fakamahino pe 'oku nau tui 'oku 'i ai 'a e uesia pea 'e fu'u 'ilonga 'eni 'i he kaha'u vave mai.
'Oku ha atu foki 'i he ngaahi 'ata 'i lalo 'a e ngaahi 'ata 'o e lingi veve na'e fakahoko 'i Kalaka pea hili hono pulusi atu 'a e hoha'a ki he ngaue ko'eni na'e toe ma'u mai pe moe ngaahi 'ata 'a e feinga ke tanu pe fufu'i 'a e ngaue pango ko'eni.
