Kamata ‘Auhia Fōsoa Talihau Te’eki Lava Ha Ta’u ^Featured

‘Oku fai foki hono fehu’ia ‘a e tu’unga tolonga mo malu ‘o e ngāue ko’eni he ‘oku ha mahino mai he taimi ni kuo kamata ke ‘auhia ‘a e fōsoa ko’eni ‘a ia na’e fakamole kiai ‘e he Pule’anga ‘a e pa’anga ‘e $200,000 (ua kilu).

Ko e ngāue ‘eni na’e fai hono fehu’ia lahi pea na’e iku ki hono faka’ilo Faka Fale Alea ‘o e Minisitā ki he Ngaahi Ngāue Lalahi ‘Etuate Lavulavu pea ne iku vetehia ai pea fakahoko mo hono tautea koe to’o ‘ene vahe he mahina ‘e 5 pehe ki hono to’o meiate ia ‘a e Potungāue ki he Ngaahi Ngaue Lalahi.

Na’e ‘ikai ngata heni ka na’e fakahā mei he Minisitā Pa’anga Dr. ‘Aisake Eke na’e mole ‘a e pa’anga ‘a e Pule’anga he ngāue pango ko’eni pea ‘oku fakahoko ‘a e ngāue kiai. Na’e a’utonu ‘a e ongoongo ni ki he fōsoa ko’eni ‘a ia na’e fai ‘a e folau kiai ‘a e Palēmia pehe ki he Hou’eki Minisitā ke fakaola ‘i he Kamata’anga pe ‘o e ta’u ni 2015 pea ko’eni kuo mahino mai koe ngāue ni kuo kamata ke māmālie ‘ene ‘auhia ‘o mahino mai koe koto laku maka fai ki moana.

Na’e kamata foki hono ‘ohake ‘a e ongoongo fekau’aki moe tu’unga ‘oku ‘i ai ‘a e fōsoa ni ‘e he Letiō Tonga ‘i he uike kuo maliu atu ka ko’eni ‘oku mahino mai mei he ngaahi ‘ata kuo ma’u mo e a’utonu kiai koe mo’oni ‘oku kamata uesia ‘a e ngāue ni pea ‘oku ma’u mo e fakamatala falala’anga mei he taha ‘o e kakai ‘o e kolo ko Talihau ‘a ia ‘oku ne pehe kapau ‘e tō mai ha ki’i matangi ‘oku lahilahi pea koe ta’e’aonga ia ‘a e fōsoa ko’eni ‘a ia ‘oku lahi ai ‘a e longoa’a ‘i he fonua ni.

‘Oku kei fehu’ia pe foki ‘i he fonua ni ‘a e ngāue ko’eni pea ‘oku kei lele pe ‘a e ngāue kiai ‘a e Komisoni Vā mo e Kakai pehe ki he Potungāue ‘Atita ‘a ia ‘oku ‘i he malumalu ‘o e Fale Alea Tonga.