Fekau’i ‘e Lavulavu ‘a Maile Niulala ke Fakamahu’inga’i Loi ‘i he founga Kākā ‘a e Ngaahi Me’angaue Tomifā Paea Featured
Ngaahi Me'angaue 'a e Vava'u Construction 'a Tomifā Paea
Nuku’alofa, 27 Novema 2015. Kuo ma’u ‘e he ongoongo ni ‘a e tatau ‘a e tohi ‘a e Pule ‘Enisinia ‘a e Potungaue Ngaahi Ngāue Lalahi Malie Niulala ki he ‘Eiki Minisitā Pa’anga ‘o fakahā kiai ‘a e mo’oni hono fekau’i fakamalohi’i ia ‘e he Minisitā ‘Etuate Lavulavu ke fakamahu’inga’i loi mo kākā ‘a e ngaahi me’angaue ‘a Tomifā Paea ke fakatau ‘e he Potungāue ‘a e Ngaahi Ngāue Lalahi.
Fakatatau ki he tohi ‘a Niulala ‘a ia koia ‘oku pule he va’a ‘Enisinia ‘a e Potungaue ‘i he ‘aho 19 ‘o Nōvema ki he ‘Eiki Minisitā Pa’anga ‘Aisake Eke na’a ne fakahā ai na’e fekau’i ia ‘e ‘Etutae Lavulavu ke ne fakahoko hono fakamahu’inga mai ‘o e ngaahi me’angāue ‘a e Kautaha Vava’u Construction ‘a Tomifā Paea ‘a ia ‘oku tau mo fokotu’u ‘i Poutaha.
Na’e ‘alu foki ‘a Niulala ‘o fakahoko ‘a e ngāue ni pea na’a ne foki mai mo’ene lipooti ‘oku hā ai koe misini pe ‘e taha ‘oku kei ngāue pea ko hono mahu’inga fakakatoa ‘o e misini ko’eni fakataha mo e toenga ‘o e ngaahi misini ‘a e Vava’u Construction ‘a Paea ‘oku ma’ulalo hifo ia ‘i he pa’anga ‘e 100.000 (tahakilu).
Na’e toe fekau’i ‘e he Minisitā Lavulavu ‘a Niulala ke foki ‘o toe fakahū mai ‘a e lipooti fo’ou pea ‘ai ‘a e mahu’inga ‘o e ngaahi misini ke pa’anga ‘e 1,000,000 (taha miliona). Na’e foki heni ‘a Niulala pea fakahū mai ‘a e lipooti fo’ou koe pa’anga ‘e 1,007,000 (tahamiliona fituafe) ‘o fakatatau mo e fiema’u ‘a e Minisitā.
‘Oku ‘i ai ‘a e fakatumutumu ‘i he founga ngāue ko’eni ‘a e Minisitā ‘a ia ‘oku lahi ai ‘a e longoa’a ai ‘a e fonua ni pea ‘oku mahino mai foki ‘oku ‘ikai ha teteki pe kohano tukupe ta’ofi ‘a e founga ngāue fakapapeliane mo hala ko’eni ‘a e Miniistā. ‘I he taimi tatau ‘oku ‘ikai pe ke fakahoko ‘e he Palēmia ha ngāue ki he Minisitā loi, kākā mo ongongata’a ni pea ‘oku tu’u fehu’ia ai ‘a e falala’anga ‘a e Pule’anga ko’eni he taimi kotoa.
‘Oku lolotonga ‘i Vava’u foki ‘a Lavulavu ‘i he’ene hopo mo Dr. Viliami Uasike Latu fekau’aki mo hono tukuakai’i ia ki he’ene ngāue hala mo totongi fakafufū lolotonga ‘a e Kemipeini ki he Fili Fale Alea 2014. ‘Oku ma’u foki ‘e he ongoongo ni ‘oku nofo pe foki ‘a Lavulavu ‘i Vava’u ‘i he Hotele Puataukanave ‘o Tomifā Paea pea ‘oku ‘ikai puli ‘a e felātani ‘i he vā ‘o e ongo tangata ni.
‘Oku ‘i ai mo e fifili pe koe pa’anga nai ‘e fiha ‘oku ma’u ‘e Lavulavu meia Tomifā Paea kapau ‘oku tu’ulāhoko ‘a e fakatau ko’eni makatu’unga ‘i he fakamahu’inga loi mo kākā ko’eni kuo tu’utu’uni ‘e he Minisitā ke fakahoko. Ko e hā nai ha ngāue ‘e fakahoko ‘e he Minisitā Pa’anga’Aisake Eke fekau’aki moe si’i tautapa ‘a Maile Niulala.
‘Oku mahino mai foki na’e tuku mai ‘e he ‘Ofisi Palemia ‘a e Ongoongo Tukuatu (Press Release) ‘o fakatonuhia’i ‘a e fo’i kākā ko’eni ka ko’eni kuo fakamo’oni’i mai ‘e Maile Niulala na’e fekau’i ia ke fakahoko ‘a e ngāue kākā mo loi ko’eni makatu’unga he’ene talangofua ki he tu'utu’uni ‘a e Minisitā.
‘Oku hā foki mo e hahanu ‘a Niulala he kuo ‘ave hono ongoongo he mitia fekau’aki moe ngaue ko’eni ka ko ‘ene fakahoko pe ‘a e tu’utu’uni ‘a e Ministā.
18 comments
-
Ta ko Tomifa ia ku kau moia ia he faka'auha fonua. He kou 'ilo na'e 'iai mo hono mo'ua ene ngaahi pisinisi ki mu'a, pea ko e mo'ua ki he Tukuhau Vahenga 'oku totu'a, pea ko e 'u bank kuo fokoleta mo e 'otu mo'ua ai. Fakailifia e fa'ahiga kakai pehee, pea sai pe kapau ne nau feinga pe nautolu ke ta honau mo'ua ka kuo toe fakapiala holo ke ta 'ehe kakai, fakatuutamaki lahi ia.
-
Mo'oni lahi koe Hafoka. Pea 'oku kei manatu'i 'ehe Vava'u kotoa e fu'u 'oho manumanu 'a Tomifa 'o hiki e totongi loki hotele pea toe holomui ai e kau fa'u faiva "Survival" koaa pe koeha, na'e teu ke nau 'omai e laui miliona ke 'inasi ai si'i kau pisinisi moe kakai 'o Vava'u. Pea hiki e kau me'a ia ki Ha'amoa 'o 'ave ki ai 'enau lauimiliona, kae tafoki hake a Tomifa ia ke ha'aki mai 'ene fu'u no ke fua 'ehe kakai. Wake up people, this is daylight murder!!!
-
Me'a faka'ulia ko e oo 'o noo mo fakamo'ua holo pea omi ke ta ia 'e he kakai. Tomifa Paea, ko e siana fefe koaa koe? Na ko ha muli koe ka ke mavahe mei Tonga ni mo e fakahalahala. Koeha ho'o ngaolo 'oku fai 'oku ke kau ai he tufa me'a'ofa 'a e Pule'anga fo'ou? Tokanga he ko e 'uha ka 'e la'aa. 'Alu 'o ta ho'o no mo e fakapiko ha'u ke ta 'e he kakai, omai mo hoo fuu meangaue fengataliaki ke fakatau 'e hai? Fiememe'a ...
-
'Oku ou muimui'i lahi 'a e ngaahi ongoongo fekau'aki pea mo Lavulavu. 'Oku ou tokanga'i e tafa'aki koeni 'a 'ene ngaahi alea mo e tama koeni ko Tomifa Paea. He ko e tama koeni, 'oku puke 'e he Pangike hono Hotele, pea 'oku feinga holo 'a Lavulavu ia ke tokoni e Pule'anga ke refinance 'a e hotele koeni. Na'e fili 'e Lavulavu ke sea he poate koeni takimamata, 'oku 'iloa ko e TTA (Tonga Tourist Association). Pea 'oku toe memipa poate 'a Tomifa 'i he TAL (Tonga Airport Limited), koeni 'oku ou toe fanongo 'oku 'ai ke memipa he poate 'a e Tonga Development Bank. Na'e teu foki mo 'ena 'ai mala'e tapulu mo Lavulavu 'i Vava'u. 'Oku ou mo'utafu'ua, he ko e memipa poate fa'a fili mei ha kakai 'oku nau lava me'a he fonua ni, koeni ku poate ia ko e bankrupt 'i he 'otu poate koee, 'ikai toe kehe ia mei he fo'i memipa poate 'a S Moehau he poate 'uhila. Tuku a Tuna ia mo Eseta ki tu'a ne 'ilonga e mata 'ena peni ka e 'oatu e kakai faka'auha koeni 'o memipa poate holo. 'Ai 'o vakai'i pe 'oku tau kei lele koaa ki mu'a pe kuo tau teka faliki tautolu ki he luo o heli.
-
'E fu'u faka papeliane ia ke fokotu'u atu he ha'ofanga ni pea ke mou kataki'i ange 'a e fakapo'uli ko kita. 'Ai ee 'a Lavu ia 'o hiki ha'aki ka e nounou he kuo 'ikai toe ongo ia ki ha me'a. Tau foki kitautolu ki he kuonga 'o e hoka tao mo e fana ngahau. Fa'ahinga kalasi ena ia ke fai mo ngahau'i 'oua 'e 'ai ke mate, 'ai pe ke mapelu 'ave atu ki falemahaki kae ki'i maloloo hotau telinga he fanongo ai pe ki hono hingoa he fai me'a hala 'i he taimi kotoa. Kataki atu kakai.
-
Ka koe 'atunga foki ia e 'ikai fou he founga ngaue, ke demand 'e Maile ha tohi meia Lavu 'o fakahoko mai ai 'ene tu'utu'uni, koe anga ia e ngaue 'a mamani 'oku 'ave tohi e tu'utu'uni kae 'ikai koe fo'i loungutu 'ata'ataa pe. Kapau na'e 'ikai ke 'iai ha tohi fka'ofisi kia Maile ke fakahoko e ngaue kakaa ko ena, 'e kei fakafekiki pe a Lavu ia he 'oku 'ikai 'iai ha fakamo'oni pau na'a ne tala ha me'a pehee kia Maile. 'E foki pe ki he 'ikai ke nau lotolahi pea tu'u fakamakatu'u 'o 'oua 'e fakahoko e ngaahi ngaue hala mo kakaa 'oku tu'utu'uni'i loungutu atu 'e Lavu. Ko Lavu ena mei fuoloa na'e 'ihe selo kae 'ikai koe pilisone !!!! sai ke tau 'ilo!!
-
Pea ko Lavulavu ena mei tu'u mai 'ene maanava he letio 87.5 hono fakahalaki koeni, uki mai mo e teu faka'ilo kena fakahahaa e mo'oni i falehopo. Pea ka hopo mo Maile, ko e toki taha'i Minisita eni talu e tupu 'a Tonga ni oku hopo pe mo 'ene kaungaue. Faka'ilo faka fale alea 'e Loni Uata ko e 'ofisa ngaue a e Minisita 'i he MOI Vava'u, koeni 'e hopo mo Maile. Kuo 'ova ho'o pinga 'au he ngalivale, kuo lele atu eni ia he sesele ...
-
mo'oni e lau "koe kulii kai moa ko 'ene pehe pehee holo pe toe fakanaamu'i ha ki'i moa koe 'ohofi ia" fakatatau kihe ngaahi fakamatala kia Lavulavu ngalingali koe tangata kakaa fakalilifu 'eni meihe pule'anga Amelika o a'u mai 'eni kihe ki'i fo'i piliote. kou pehee oku 'ikai totonu ke tuli ki 'api 'a Lavulavu, OKU TOTONU KE TULI KI HU'ATOLITOLI HE KO HONO 'API FE'UNGA IA.... pea mo'oni e lau 'a Clive Edwards, koe haa kuo tuku ai ki tu'a e ki'i 'ofisa ia kae fakalatalata'i pe fu'u motu'a'i moa ia Minisita I loto... tau lotu ke mo'oni Tonga ke 'oua na'a tau mata'ivalea he huu mai 'ae ulofi he kili'i lami... ko fee koaa 'ae tafa'aki INTERNAL AFFAIRS a ee oku totonu ke nau ma'u 'ae totonu kakato ke huaa'i e faihia kotoa pea 'oange kiai 'ae tautea totonu mo fe'unga kihe lao kuo ne maumau'i....
-
Hoto fakapo! Ta kuo toho 'e Lavu ia ene mahina 5 tauteau he fu'u me'a ni e
-
Kataki 'a e Palemia ko e ha 'oku kei fakalaloa'i ai 'a 'Etuate Sungalu Lavulavu he kuo mata'a'a ki Tonga mo mamani 'a 'ene feinga ke tamate'i hotau pule'anga masiva ni. Ko e fakamo'oni 'eni ta'e toe fehu'ia mo mata'a'a ke tau tui a ki ai ko e tangata ni ko e tangata kaakaa. Ko e ha 'oku ne holi ai ke hiki 'a e mahu'inga mei he 100,000 ki he Taha Miliona. Ngalingali kuo fai ha felotoi ia pea mo Tomufa Paea ke hu mai e fu'u silini ko 'eni ngalingali ko e hivakilu ke na toki vahe. Tamani eeee he toki me'a faka'ulia mo'oni ko fe ai e 'ofa fonua 'oku luau. Fanongo 'i he letio 'a e si'i hahanu 'a Maile Niulala 'oku 'ikai ke ne 'ilo pe ko e ha 'oku holi ai 'a 'Etuate Lavulavu ke fakatau mai e ngaahi fu'u misini maumauu he 'oku 'i ai pe misini pehee 'a e Potungaue pea 'oku fe'unga pee ia. Fai aa ha tu'utu'uni fakapotopoto 'e Palemia kia 'Etuate Sungalu Lavulavu he ka hoko atu he toenga taimi ko 'eni ki he to'u fili hoko 'oi hoto fakapo pe 'e feefee 'a Tonga 'i he kaha'u.
Malo