Lao ‘o e Vaotā: Fa'ifa'iteliha 'a e Ma’olunga kae Faka’ofa e Ma’ulalo ^Featured

‘Oku makatu’unga ‘eni ‘i ha lipooti mei he ‘Atita ‘a e founga na’e ‘ikai kene muimui ki he lao fakatau (procurement regultions).

‘Oku hoko ‘a hono fakamalōlō’i ko’eni ‘o Lavemai kene ‘ohake ‘a e hoaha’a lahi ‘i he ngaahi mītia, kakai ‘o e fonua pehē ki he kau ngāue faka-pule’anga ki he tu’unga ‘oku ‘i ai ‘a e fonua mo e lao. ‘Oku ‘uhinga eni ki he natula faka vaotā ‘a e lao ‘o e fonua he ‘oku tukuange ‘a e malohi mo e ma’u tu’unga ma’olunga mo kau he kau taki ‘o e fonua ka e si’i tautea ‘a e ma’ulalo ‘o hange ko’eni kuo hoko ki he keisi ‘a Tevita Lavemai.

‘Oku kei ninimo ni (hūfanga he fakatapu) ‘a e fonua he fo’i pāloti ‘a e Fale Alea ke fakahaofi ‘a e Minisitā ki he Ngaahi Ngāue Lalahi ‘Etuate Lavulavu he faihala tatau pea toe lahi ange mo e pa’anga ‘a e Pule’anga na’e mole ai kae si’i tuku ki tu’a ‘a Tevita Lavemai ia he ‘oku ‘ikai koha Minisitā ia pea ‘oku sai pe ia he koe tokotaha ngāue faka-pule’anga pe.
‘Oku toe fakamamahi ki he anga ‘o e sio atu ‘a e kakai he ‘oku te’eki ke fakahoko ‘e he Palēmia ia ha tautea ki he Minisitā ko’eni pea ‘oku hangē ‘eni ia ‘oku fahu pe ia mo fa’iteliha he lao ‘o e fonua.

Ko e me’a ‘oku mahino mai mei heni ‘a e natula fakatikitato ‘a hono tataki ‘o e fonua pea mo e fu’u e’a mo ho’ata mai ‘oku kehekehe ‘a e me’a ‘oku hoko he fonua mo e vīsone na’e fakataumu’a’aki hono fatu ‘o e Konisitūtone ‘o e fonua mo e lao pea fakamahino ai ‘oku “Tatau ‘a e Tokotaha kotoa he Fofonga ‘o e Lao”.

Ko e natula foki ‘o e vaotā mo hono lao ‘o fakatatau ki hono ‘ātakai ko e “Mo’ui pe ‘a e Mālohi” (Survival of the Fittest) ‘a ia ko e me’a ia ‘oku hā mai ‘i Tonga monu’ia he ngaahi ‘aho ni. Kuopau keke ma’u mafai pea ke kau he kau taki ‘o e fonua pea ke tu’umālie kae faka’atā ko e keke faihala he ‘oku ke ma’olunga ko e he lao pea teke mo'ui. Kapau leva koha tokotaha pe koe ‘oku ‘ikai keke kau ki he kulupu ko’eni pea kuo pau keke mo’ulaloa ki he lao pea ke iku ki he mate.

Ko e tā ‘eni ia ‘oku ongo pea uhu ki he fonua mo hono kakai pea ‘oku ‘uhinga pehē ‘a hono ‘ohake ‘i he ngaahi mītia ‘o hoko ko e kaveinga ke fai hano siofi he ‘oku ‘mahu’inga ke fakahoko ha ngāue fakavavevave ki he fa’ahinga fakaehaua ko’eni.

Ko e poini mahu’inga taha heni ‘oku tatau ‘a e lao ki he Tonga kotoa.