Fakaloloma Palopalema hū Ta’efakalao mai ‘o e Moa: Ke Pule’i Totongi Moa ‘e he Pule Fakafuofua ^Featured

‘Oku hā mai foki ‘i he felāfoaki ‘oku fakamafola mai ‘i he ngalu’ea ‘a e hoha’a ‘a e kakai ki he ‘ikai muimui’i lelei ‘e he ngaahi kupu fekau’aki hangē ko e Kasitomu mo e Potungāue Mou’i honau fatongia ‘o hoko ai ‘a e ngaahi palopalema pehe ni. ‘I he taimi tatau ‘oku ‘oku toe masila ange foki ‘a e fakakaukau mo e fokotu’utu’u ‘a e kakai ‘oku nau fakahoko ‘a e ngāue ta’e fakapotopoto pehe ni ‘i hono fakahoko ‘a e fa’ahinga hia ni pea ‘oku faingata’a ma’u pe ia ke muimui’i.

‘Oku faka’ofo’ofa ‘a e hū mai ko’eni ‘a e Pule’anga ia ‘i he tafa’aki ko’eni ke fakamahino ko e mo’ui ‘a e kakai ‘oku mahu’inga taha pea ke fakamahino ki he kakai ko’eni ‘oku ‘ilo’i mo fakatokanga’i enau ngāue pango ‘oku fakahoko. ‘Oku ‘ikai ketau loto ke tuhu kiha taha heni ‘o hangē ko si’otau kainga Siaina he ‘oku lahi hono ‘ohake honau hingoa fekau’aki mo e kaveinga ni ka ko hono lulu’i ‘eni ‘o e kau pisinisi mo e kakai ‘o e fonua kenau toe tokanga ange.

Ko e mamafa ‘o e kaveinga ni ‘oku si’i hilifaki ia ‘i he uma ‘o e kakai masivesiva ange ‘i he anga ‘etau nofo ‘i he sosaieti. Kuo mahino foki ko e tu’utu’uni fakataimi 'eni ‘a e Pule’anga ‘e fakatau puha pe ‘a e moa pea ko e ngaahi puha moa pe ‘oku ‘osi leipolo’i pau 'o mahino 'oku faka'ofo'ofa 'o ikai 'osi hono taimi (expire) ‘oku malava ke fakatau atu.

‘Oku ‘avalisi foki ‘a e totongi ‘o e moa ‘oku mei he pa’anga ‘e $35 ki he $45 ki he puha pea ‘oku faingata’a ‘eni ki si’i ngaahi fāmili tokolahi kenau fakatau puha ‘o makatu’unga ‘i honau ivi fakapa’anga. Ko e palopalema ‘e taha ko e ngaahi fāmili lahi ‘i he fonua ‘oku ‘ikai ha’a nau ‘aisi ke fakatolonga ai ‘a e moa pea ‘oku lahi moe ngaahi ‘api ia ‘oku te’eki ke nau ma’u ‘uhila.

Na’e angamaheni ‘aki foki ‘ehe ngaahi fāmili ‘a e fakatau pa’anga ‘e $3 ki he $3.50 ki he kilo pea na’e to’o ngofua ki he kiki faka’aho ka ko’eni kuo a’u ki he tu’unga ‘enau si’i fua ‘a e kanongatamaki ‘o e ngāue pango ko’eni kuo fakahoko ‘i he fonua. Kuo fuoloa mai pe foki ‘a e fa’ifa’iteliha ia ‘a e kau pisinisi ki he totongi ‘o e moa pea kuo fetō’aki hono totongi ‘o ‘i ai ‘a e taimi kuo a’u pe ia ki he pa’anga ‘e $60 ki he puha ‘i he taimi ‘oku si’isi’i ai.

‘Oku hoko ‘a e palopalema ko’eni kene fakahā mai kuo taimi ke ngāue leva ‘a e Komiti Pule Fakafuofua ‘a e Pule’anga (Competent Auhtority) ke mapule’i ‘a e totongi ‘o e Moa ke malava he pule’i ‘a e fe’au’auhi hono hū mai ‘o e koloa kiki ni he ko hono ola e hono tukuange kuo hoko ai hono ‘ikai ke mapule’i pea kuo hū tavale mai ‘o a’u ki he tu’unga ko hono faingata’a ke muimui’i.

‘E tokoni foki ‘eni ki he fatongia ‘o e Kasitomu mo e Potungāue Mo’ui pea ‘ikai ngata ai ‘e fe’unga ‘a e totongi ki he si’i kakai ‘o e fonua pea tu’uma’u ‘o ‘ikai fetōkaki ‘a e totongi ‘i he taimi ‘oku hongehonge ai. ‘Oku mahino pe foki koe kiki ‘eni ‘oku lahi taha hono faka’aonga’i ‘ehe kakai ‘o e fonua pea ‘oku fiema’u ke mapule’i ‘o hange ko hono mapule’i ‘o e kapaika, suka, mahoa’a mo e ngaahi koloa ‘oku lahi hono faka’aonga’i ‘e he ngaahi fāmili faka’aho.

Na’e ‘osi tu’utu’uni ‘e he Pule’anga ‘o Tu’ivakanō mo e Fale Alea ke mapule’i ‘a e totongi ‘o e moa pea ‘oku totonu ke muimui’i ‘a e ngāue ko’eni. Kaikehe ‘oku tau faka’amu ke fei mo solova ‘a e palopalema ni ka e malava ke foki ki he nōmolo he ‘oku faka’ofa si’i kakai ‘oku vaivai honau ivi fakapa’anga. 'I he taimi tatau 'oku totonu ke fakahoko ha ngāue ki he kau pisinisi 'oku nau fakahoko 'a e ngāue ta'efakapotopot ko'eni.