Founga Ngāue Faka Pāpeliane ‘a e Pule’anga: Fehu’ia Hono Fakafoki ‘o ‘Eti Teumohenga Ki he ‘Ofisi Palēmia Featured
Tohi Ki he 'Etita
Nuku'alofa, 3 Sepitema 2015.
'Etita,
Kataki fakamolemole kae tu’u atu mu’a ‘eku ki’i tohi ko’eni ho’o kolomu he kuo mei tu’u ‘eku manava ‘i he’eku lau hifo ‘a e ongoongo tukuatu ‘a e ‘ofisi ‘o e Palēmia fekau’aki mo e teu folau ‘a e Palēmia ki he fakataha ‘a e PIDF ‘i Fisi fekau’aki mo e ‘atakai. ‘Etita ‘oku ‘ikai keu meimei tui ki hoku poko’i mata ‘i he’eku vakai hifo ‘oku kau ‘a e matāpule ko ‘Eti Teumohenga ko e Tokoni Sekelitali (Deputy Secretary) ‘i he ‘Ofisi ‘o e Palēmia ‘i he folau ko’eni.
Ko e matāpule ko’eni tapu ange moia na’e ‘osi tuli ‘aupito mei he ngāue faka-Pule’anga ‘i he malumalu ‘o e Potungāue Fonua mo e Savea ‘i he ngaahi ta’u kuo maliu atu makatu’unga ‘i he’ene faihala mo ‘ikai muimui ki he lao mo e ngaahi tu’utu’uni ‘a e ngāue Faka Pule’anga. ‘Oku mahino ki he kau ngāue faka pule’anga kotoa ‘o Tonga ni ko e tokotaha ni ko e kaungame’a fafale ia ‘o e Sekelitali Pule & Sekelitali ki he Kapineti Dr. Palenitna Langa’oi pea ko’eni kuo ma’u ‘a e pale ‘o e tokotaha ni ke hoko ki he lakanga ma’olunga ko’eni pea ke tokoni pe ki he Sekelitali Pule & Sekelitali ki he Kapineti ‘i he ‘Ofisi ‘o e Palēmia.
Oku toe kau atu ki he muimui folau ki he Palēmia ‘i he fakataha ko’eni pea ‘oku ‘uhinga pehe ‘a ’eku faka’uhinga ‘oku faka pāpeliane ‘a e founga ngāue ‘a e Pule’anga ‘o e ‘aho ni. ‘Oku hangē ‘eni ia ‘oku mata’ā ‘a e Pule’anga ki hono fakafoki mai ‘a e kau faihala mo e kakai na’a nau maumau lao ‘i he ngaahi ngaue’anga ‘i muli mo Tonga ni ke fakahoko ‘a e ngāue ‘a e fonua kae tukuange ‘a e kakai ‘oku ma’a mo falala’anga honau lekooti ngaue.
Lolotonga ‘a e lahi ‘a e palopalema ‘i hono tukuaki’i ‘o e Pule’anga mo ‘ene founga ngāue kuo toe fakangofua pe ‘e he kau nima ‘o e Palēmia ke fakahoko ‘a e fo’i fokotu’u lakanga faka pāpeliane ko’eni pea ‘oku fakalahi atu ai pe ‘a e palopalema ki he Pule’anga.
Kapau leva ko hono anga ‘eni ‘o e losika ke fakatonuhia’i ‘a e me’a ‘oku kovi mo hala pea ‘oku ou fokotu’u atu ‘Etita ketau kole ki he Pule’anga ke fakafoki kotoa atu ‘a e kau ngāue faka-Pule’anga kuo ‘osi tuli mei he ngāue kenau foki atu ‘o ngāue ke ma’u si’a nau faingamālie mo tokoni ki si’onau ngaahi famili he ko’eni ‘oku ngofua pe ia ‘i he Pule’anga ko’eni.
Faka’apa’apa Atu,
Ngāue Fakapule’anga Tutuku
8 comments
-
Koe fu'u pulepaka pe koena ko 'akili na'e taaimu'a hono hamu ki lalo e kakai, pea 'oku ne kei fai pe hamu kae kaka hake a paka-veni, paka-osi, paka-'oi, paka-'aukai, paka-'eti mo hai fua 'ene fanga paka 'o toki fa'ifa'iteliha he pa'anga moe koloa 'ae fonua.
-
Ofisa Paka oku ou poupou atu ki hoo lau. Tau hanga ki mua tuku atu e ngutulau ke fai pe ia ehe KELE'A oku nau ngali moia. He koe pepa pe koia oku nau hamu lahitaha hifo e kakai. Koia ai Nepituno tuku pe ngutulau ia ke fai ehe Kele'a e.
-
Pehe tokua na'e 'iai ha ongo kapa paka e ua, koe taha na'e 'iai e fanga ki'i paka Tonga pea koe taha na'e 'iai e fanga ki'i paka Ha'amoa. Na'e feinga e fanga ki'i paka ni ke nau hola ka koe kapa paka Tonga, koe taimi kotoa pe ku a'u hake ai ha kii paka ki olunga ke hola ku fusi hifo ia he fanga ki'i paka koee 'oku nau kei i lalo. Koe kapa paka Ha'amoa ne nau hao kotoa he na'a nau fetokoni'aki ke nau a'u kotoa ki 'olunga.
Koia ai 'ofa mai aa kau Tonga 'o fai ha me'a ke langa hake ai hotau fonua. Kapau 'oku ke lotomamahi pe 'ita kataki atu 'o fai ha'o ki'i lotu. He na'e 'iai e 'uhinga na'e fili ai e kakai koena ke nau fai e ngaue kae 'ikai fili koe. Na'e 'ikai ha'anau kovi kokoe pe 'oku kovi ho loto pea mole ho taimi he fakakovi takai holo ke nau ngali kovi. Tuku ai pe kinautolu ia sio koe ki he 'Eiki, tui pe 'o faitotonu ? pea mou 'ofa mai 'o fai ha talanoa ke tau langahake ai kae tuku aa e ngutulau naa mou lele mai kau tuitui atu ha mou piva.
Malo
'Ofisa Paka -
Malo Etita e omi e ngaahi ongoongo mei he fonua tupu'anga... Oku fakaloloma he ko e Pule'anga 'eni ne fai kiai e misi moe 'amanaki ki ha fua fatongia oku makehe hono anga mei he ngaahi ta'u kuo maliu atu.. O makehe 'I he hulu atu a e faitotonu moe 'ata kitu'a o e ngaue 'a e loto'i Pule'anga ... ko'eni kuo vakai kiai e Tonga kotoa pea hange oku hu'u eni Pule'anga ki he me'a kehe ia ... kuo kamata ke asi mai e founga 'oku 'ikai taau pea kuo tau vakai kiai pea ko hono mo'oni oku 'ikai ke taau...
-
I heeku vakai, ku hanga e pule'anga ia koeni o pani e kakai pehee, ko Bloomfield ena tuli mei fisi, pani'i atu ia ke CEO, ko e tama koena ku pani'i atu ia ehe sekelitali pule, pani'i atu mo Kalafi kuo ilo e he valevale ki he lalahi 'ene heke holo. pani'i atu mo viliami taufa ko ene fofoolinga ngutulau pe hange ko e taki. ka ne kei moui a osama, kadafi mo sadamu kuo omi kinautolu ke pani'i koenau mau e elemeniti o e fakaehaua mo e tamate tangata
-
'Ikai ke u ofo he ko e kuonga eni 'o e lulu tava na'e fa'a kikite'i 'e Palofita 'Akilisi Pohiva. Kuo toe fakakakato pe ngaahi kikite 'i hono kuonga. Kuo ne fili pe 'a Po'oi ke PA, Piveni ki he Potungaue Ako. Viliami Taufa mo Kalafi ke fale'i. Na'e kau pe foki 'a Tevita Lavemaau hono fili 'a Feleti Fa'otusia, ka kuo fakata'e'aonga'i, Ko e taimi leva eni 'o Palenitina ke 'oatu 'ene kau Pone. FEEFEE hono 'omai e Forbes ? Mou toe kumi ki hono mo'oni he 'e aata mai e maama 'e taha tokua 'oku 'ataa pe 'a 'Aholotu ia mo 'Aisake ka ko e taha pe ia e kau pone.
Feefee 'a Piveni, taha e kau pone, na'e tala 'oku 'ikai ha software ka ko eni kuo lolotonga fai 'ene ngaue he Potungaue ako. 'Oku fai koaa 'a fe e hopo 'a Siaosi Pohiva mo Sione Mokofisi ? Mau ke i tatatli pe 'e fai 'afe. -
Kuo malie tama tu'unga 'oku a'u kiai 'a e PSC mo e founga hono recruit e kau ngaue ki he ngaahi tu'unga ma'olunga he ngaue faka pule'anga. Tuku e lelei kae 'omi e pone mo e kaungame'a mo e kakai 'oku faingofua ke pule'i. 'Oku fefe leva e lao ki he ngaue faka pule'anga pe kuo fakapekia moia..
-
Na'e tu'uaki nai e lakanga ko eni? Ko hai fua e kakai na'e tohi kiai? Koe me'a ni 'oku 'ikai toe ma'u ha taha ia 'oku ma'a hono lekooti ke fai e ngaue ko eni? Fefe e si'i kau ngaue ne ma'a haohaoa honau lekooti ngaue he pule'anga, pea nau lele atu ki muli 'o ngaue ai koe feinga ke ako ha ngaahi taukei fo'ou, pea nau foki mai ki Tonga ni 'o tohi kole kihe ngaahi ngaue 'ae pule'anga, pea 'ikai fiema'u kinautolu ia kae fili atu e fa'ahinga ia na'e 'ikai 'ilo pe koeha 'enau me'a na'e fai. Fakatata'aki eni e fili 'oe CEO ki he MIA. Koe CEO ki he Potungaue Ako kuo mau fanongo 'e toe tu'uaki, 'aia na'e 'ikai ma'u ha taha fe'unga ia mei he fa'ahinga na'e 'osi interview? Kae vave pe mo molemole hono foaki ange e ngaue 'ae kakai na'e faihia pea tuli he ngaue. Fakaoli pea toe fakaloloma.