“ 'Oku ou poupou lahi atu ki he komeni lelei 'a Kitione 'a e matu'aki mahu'inga 'o e kau mai 'a e kau ako 'o hange ko Palofesa Dr Malakai Koloamatangi (Mafua 'ae Lulutai) he talanoa tau'atamai tau'ataina he me'a 'oku hoko ka e 'ikai ko e talanoa tausino taufakapopula he funga 'o e fiema'u fakataautaha fakaetangata.
'E hoko 'ene huluhulu ko e maama ki he fakapo'ulilolo 'oku lolotonga to 'o ne kapu mo 'akilotoa 'a e fonua ko e tupu mei he 'oho kuikui mo fakavalevale 'a e taki mo e pule'anga ke aoniu mo falute ta'efakakaukau mo ta'efakapotopoto 'a e mafai.
Ka aoniu mo falute 'e ha taki mo e pule'anga 'a e mafai ha fonua ko e toki taki mo e pule'anga pule fakaaoao mo fakatikitato mo e fonua mo'ui fakaongoongo mo nofo popula mo'oni pea ka vahevahe lelei, mahino mo fakapotupotutatau (faka-palanisi he fakalea 'a e palofesa) 'a e mafai ha fonua ko e toki taki mo e pule'anga pule lelei mo faka'ofo'ofa mo e fonua mo'ui fiefia mo melino mo nofo tu'umalie mo tau'ataina ia.
'Oku 'i ai 'a e manavasi'i na'a hoko 'a e 'oho kuikui mo ta'eufi ko 'eni 'a e taki mo e pule'anga ke falute mo aoniu 'a e mafai he fonua ke kau ai hono vahevahe lalahi 'e tolu he konisitutone ki he fakahokongau (executive), fakafalealea (legislative) mo e fakamaau'anga (judiciary). Ka faifai 'o a'u ki he tu'unga taupotu mo fakaloloma ko 'eni 'e mole leva 'a e tau'ataina 'o e mafai ka e hoko ko e popula pea liliu leva mei he mo'ui fiefia mo melino mo nofo tau'ataina ki he mo'ui fakaongoongo mo nofo popula.
Kuo kamata ke hoko 'eni 'i loto he loto pule'anga 'o hange ko 'ene hoko he mitia mo e ha fua pea ka hokohoko atu 'e hoko he ako mo e 'aati 'o hange ko 'ene hoko he hisitolia he ngaahi fonua pule fakaaoao mo fakatikitato 'o hange ko Siamane ki mu'a mo Lusia ki mui.
Ko ia ai 'oku fu'u fiema'u ke fao'i 'a e talanoa fakapolitikale mo fakasosiale he mafai mei hono fakatatau mo fakapotupotutatau (fakapalanisi) he lau 'a Mafua 'a e Lulutai) he kilitu'a fakatekinikale 'o e 'atakitu'a (transparency) mo e taliui (accountability) ki hona kanoloto loloto 'i loto 'oku tefito he lao mo e lao he konisitutone he vaha'a 'o e fetukuaki 'a e ta'efakalao mo e ta'efakakonisituone mo e fakalao mo e fakakonisituone. ”