“ 'Oku ki'i lahilahi tama hono lau 'o e hifo 'a e PM mei he masani 'a e 'Ofisi 'o e Pallemia ki he palaku 'a e tu'ungaveve 'o tufiveve fakataha mo e kau tufiveve ko e fie fakatatau ki hono fakahifo 'e he 'Otua hono 'Alo pe taha ko Sisu mei he masani 'o Langi ki mamani ke 'alo'i he kinoha'a 'a e 'ai'angakai 'o e manu.
'Oku na fu'u kehekehe 'aupito he 'oku hoko 'a e hifo 'a e PM mei he masani hono 'Ofisi ki he tu'ungaveve 'o tufiveve mo e kau tufiveve ko e taipe ia hono tukuhifo 'a e PM moe 'Ofisi 'o e Palemia ke tu'unga tatau mo e tu'ungaveve.
Ka 'oku hoko 'a e hifo 'a e 'Alo tofu pe 'e taha 'o e 'Otua ko e taipe ia hono hiki 'a e fa'ahinga 'o e tangata mei he mate mo e mala'ia ta'engata 'o e angahala ki he mo'ui mo e monu'ia ta'engata 'a e 'ofa mo e kelesi 'a e 'Otua.
'Oku 'asi mai 'a e to e me'a 'e ua 'oku tu'unga tatau ai 'a e 'atamai 'oe PM mo MP Lavulavu (kimu'a pea toki mahino 'ene founga mo e sipinga mo hono 'ata totonu 'e lao mo e Fakamaau'anga) mo e tu'ungaveve pea ua ko e 'ikai ha'ana 'ilo mo e poto fe'unga ke na Kapiteni he vakapuna 'o e fonua ka ko e to e tufiveve pe 'i loki pasese.
Na'e kamata 'e MP 'Etuate Lavulavu 'a e fo'i fakanafala ko 'eni ko e tufiveve pea to e hopo mai 'a e PM 'o hokohoko atu hono fai 'o e tofiveve ka e 'ikai mu'a ke na takitaha nofoma'u hona fatongia ko e PM mo e MP ka e tuku pe 'a e kau hikoveve honau fatongia he ko e nofo he fonua 'oku takitaha fai hono fatongia mo tauhi 'a e va lelei 'o e nofo 'a e fonua.
'Oku pehe tofu 'a e nofo 'api 'o takitaha fai 'e he tamai, fa'e moe fanau honau takitaha fatongia he tauhi honau va ke lelei ka e ma'uma'uluta 'a e nofo ka e 'ikai hange ko e tuku 'e he tamai mo e fa'e 'a tokanga mo falehanga ka na fai 'e kinaua 'a e fatongia 'o e fanau!
Faka'uta ange ka hiki mo li'aki 'a e Kapiteni 'o ha vakapuna mei hono fatongia 'i loki faka'uli ki loto vaka 'o fai 'a e fatongia 'o e kau setuata 'i loki pasese. 'E malavanoa ke hoko 'a e me'a 'e ua 'ulukai ko e he 'a e vakapuna mei hono 'alunga pea ua ko 'ene tau ha 'otu mo'unga 'o pa. 'Oku na fakatouola pe koe mate mo e 'auha!
Ko e fifili koe ha na'a na PM ai mo MP he Falealea 'o e fonua mo na kapiteni ai he vakapuna 'o e fonua? 'Oku kau nai ki ai 'a e sisitemi filifalealea mo e fa'unga konisitutone fo'ou mo e temokalati muli fonu polopalema 'oku tau fematematei he fa'ofua kuikui ai? ”