“ Ne fiu e media council he kole ki he Potungaue Ako ke fei mo tali mai e ngaahi launga mo e fehu'i fekau'aki mo e sivi 'io e 2015 pea 'oku kei kalo ni holo pe kau seniale 'a e minista ako ke fai ha tali neongo ne 'osi fakaata 'e he ministaa ki he'ene kau seniale ke nau fai ha tali. Ka ki mu'a hono fakaataa ne toe fetu'utaki hake 'a Po'oi ia ke fakangatangata pe me'a te nau lea ki ai. Ka ko ena ko e me'a ena kuo hoko kuo kamata ke mahua mai e ngaahi me'a na'e fufuu'i. Tau fakamalo ki he ni'ihi tokosi'i he Potungaue ko eni 'oku nau loto lahi pea 'ikai sio lakanga ka nau lipooti totonu e me'a na'e hoko. Fakamalo ki he ni'ihi 'ofa fonua ne nau tuku mai ki tu'a e fu'u palaku 'oku hoko he loto'i Potungaue ni. Ta ko e me'a ia kuo fetongitongi ai e kau CEO talu mei hono fekau 'a 'Emeli Pouvalu ke fakafisi he na'a ne fakafepaki'i fefeka e nga'unu ki he raw marks mo hono fakangaue'i 'a Piveni. Ne fili 'a Koloti Tupou kae 'ikai ko 'Emeli pe Pingi he na'a ne 'amanaki 'e fai 'e Koloti hono loto pea ko e taimi pe kuo na keheehe ai mo Koloti pea le'ei ia ki tafa'aki kae 'oatu e motu'a kaakaa 'e taha ke acting. Ko e motu'a acting ko eni 'oku ne lolotonga fakatotolo'i holo pe ko hai na'a ne 'ave ki tu'a 'a e lipooti. 'Aia ko e me'a 'e hoko ko hono tukuaki'i e tama na'a ne tala e hia kae tuku e kau hia ia. Me'a eni ko e 'alu e HIA 'o kumi e HAOHAOA. Koe me'a foki ia kuo 'ohake ai 'a ki'i Pone he 'oku lolotonga fakalongolongo holo 'o ngali anga lelei mo talangofua ka ko e tupu '
ene pehee he 'oku lolotonga malu'i anga lelei mei he PSC. Anga fefee ke tau falala ki ha taki 'a ha taha 'oku 'iai hano hisitolia fai hia pea toe lolotonga malu'i anga lelei. Ko e Pule'anga Tonga pe 'oku tali lelei ai e fa'ahinga 'ai'ai noa'ia ko eni.
Ko e me'a 'e taha, Ko e ha 'oku faingata'a ai ki he minista ako ke 'asi mai 'o tali mai ki he lipooti ko eni. Na'a ne tala foki na'e hanga 'e he kau taki 'o e potungaue 'o fa'a fufuu'i e raw marks. Ka ko eni kuo ne feinga ke tanu 'ene fakaveve kuo fai he potungaue ni he ki'i taimi nounou kuo ne taki ai. Kuo tuku eni 'ene fa'a polepole mo lailaione mai he TV mo e Falealea hono taukave'i e raw marks ka kuo kamata ke fai e fakatonuhia 'o tala ki he'ene kau ngaue 'oku te'eki fai ange ki ai ha launga. Ka e fefe launga ia ki he CEO mo e launga 'oku ha he lipooti ? Fai mo li e tauveli kae fei mo fili mai ha taha mei tu'a ke hoko atu e ngaue he 'oku hange ho'o maumau mo ho'o fakaveve ha ngaue 'a ha saikolone. 'E fu'u faingata'a ke ke fai e fakalelei he 'oku 'ikai ha'o 'ilo pe taukei fakapolofesinale. Mo'oni 'a Dr Taufe'ulungaki ko e taukei fakapolofesinale 'a e motu'a ni 'oku fe'unga pe ia mo e levolo 'o ha ki'i lautohi pule'anga kikikiti 'i Ha'apai.
Fai a mo mou ngaue mai kakai ke tau fakakaukau'i ha founga ke 'ave'aki e motu'a ni kitu'a kimu'a na'a tomui. ”