Fale'i ki he Hou'eiki Fafine ke Faka'ehi'ehi mei ha'anau Feitama Featured
Dr. Reynold 'Ofanoa lolotonga 'ene fale'i ha taha 'o e Hou'eiki Fafine
Nuku’alofa, 15 Fepueli 2016. Kuo tuku mai ha fakatokanga mo ha tapou mamafa mei he Potungāue Mo’ui ‘a Tonga ki he Hou’eiki Fafine ‘o e fonua kenau faka’ehi’ehi mei ha’anau feitmama lolotnga koia ‘a e mafola ‘a e fokoutua fakatu’utamaki ko’eni koe Zika ‘i he fonua.
Fakatatau mei he fakamatala mei he Potungāue Mo’ui ‘oku fakafuofua ki he toko 549 ‘a si’i kakai ‘oku mahamahalo’i ‘oku ma’u kinautolu ‘e he mahaki ni ka ‘oku fakahoko ‘a e ngāue ke fakapapau’i mo ta’ota’ofi foki.
Fakatatau kiha fakamatala ‘a Dr. Reynold ‘Ofanoa mei he Potungāue Mo’ui ‘oku nau fale’i ‘a e Hou’eiki Fafine kenau faka’ehi’ehi mei ha’anau feitama kae ‘oua leva kuo mahino kuo lava ‘o ta’ofi ‘a e mafola ‘a e fokoutua fakatu’utamaki ni. Na’a ne toe pehe foki ‘oku ‘ikai kenau fakapapau’i ha taimi pau ka ‘oku malu ange pe ke faka’ehi’ehi.
‘Oku fakahoko foki ‘a e fale’i tatau ki he ngaahi fonua kaunga’api hili ange hano fakapapau’i ‘oku ‘i ai ‘a e ngaahi keisi ‘oku mahamahalo’i ‘i Ha’amoa ‘Amelika. Koe vailasi Zika foki ko’ene tupu mei Brazil, Saute ‘Amelika pea na’e toki fakahoko hano fakatokanga’i fakamamani lahi ‘ene fakatu’utamaki he ta’u ni.
