“ Malie 'aupito 'a e ta'anga ni pea malo mu'a Nepituno hono kei 'omai 'a e 'aati mo e litilesa ke tau 'inasi ai hotau 'atamai mo e fakakaukau mo e loto mo e laumalie.
'Oku tau ma'u heni 'a e 'ata malie 'o e faiva ta'anga he ngaahi ta'u 1800 pe kongloto mo e kongamui 'a e senituli 19.
'Oku mo'oni hono ngaue'aki 'a e ngaahi lea ma'ama'a ka e fihi fau 'a e 'uhinga hono to e ngaue'aki 'a e kalasi kehekehe 'e 3 'o e heliaki. 'Oku hange 'a e heliaki ha fika 'oku hanga 'e he 'atamai 'o vete ke ma'u hono mo'oni. 'Oku ma'u heni 'a e malie 'o e faiva ta'anga. 'Oku fanau'i leva 'e he malie 'o e ta'anga 'a e ongo ko e mafana mo e vela mo e tauelangi.
'Oku to e mahino ange heni 'a e lea ko e "sipitau," 'a ia ko e ta'anga mo e hiva mo e haka fekau'aki mo e tau (war), 'o tefito hono ue'i 'a e loto mo e ongo ke to'a mo e tamate mo e malohi ka e 'ikai ko e fiefia mo e ilifia mo e mafana mo e fo'i.
'Oku to e malie mo ma'uhinga hono ngaue'aki 'e he punake 'a e lea faka-'Ingilisi ko e kalake (clerk) ko e sikalaipe mo e tohinima he'ene tu'u he ta'anga. ”