Ikuna Tongasat 'i he hopo mo ‘Akilisi Pohiva mo e PSA ^Featured

Ko e hopo foki ‘eni ‘i hono faka’ilo ‘e ‘Akilisi Pohiva mo e PSA ‘o taki ai ‘a e Sekelitali Seniale ‘a e PSA Mele ‘Amanaki ‘a e Tongasat ‘o pehe na’e ‘ikai fakalao hono totongi ‘e he Pule’anga ki he Tongsat ‘a e pa’anga'Amelika ‘e 25 miliona tupu ‘i he ta’u 2011.

Ko e pa’anga foki ‘eni na’e totongi mei he Kautaha Siaina ‘o fakafou mai ‘i he Pule’anga Tonga ke totongi ki he Tongasat ‘a ia koe totongi 'eni ki hono ngaue’aki ‘a e tu’unga Satelaite na’e lisi mo faile ‘e he Tongasat pea lisi atu 'o ngaue'aki 'e he kautaha Siaina.

Ne tukuaki'i foki 'e he kau Tatatalaaki na'e hala 'a e totongi ko'eni he 'oku maumau ai 'a e Lao Public Finance Management Act 2002.

Ko  laumalie foki 'o e fakatonutonu ko'eni ko hono 'eke 'e he Talatalaaki ke totongi fakafoki 'e he Tongasat 'a e pa'anga ko'eni na'e totongi kiate kinautolu ka 'oku tu'utu'uni 'e he Tu'i Fakamaau Lahi 'e 'ikai totongi fakafoki 'e he Tongsat 'a e pa'anga ko'eni.

'I he'ene pehe leva 'oku ikuna 'a e Tongsat 'i he 'eke ko'eni.

Ko e konga foki 'a e tu'utu'uni 'a e Tu'i Fakamaau Lahi koe pa'anga ko'eni koe public fund pea na'e totonu ke 'ave ki he Fale Alea ke fakapaasi mei ai ka ko e issue kehe 'eni ia neongo 'oku 'i he hopo tatau pe.

Ko e poini 'oku mahino 'i he tu'utu'uni ko'eni na'e 'ikai tali 'a e 'eke ke totongi fakafoki 'e he Tongasat 'a e pa'anga na'e 'eke 'i he fakatonutonu ko'eni.

Ko e hopo foki ‘eni na’e fakaongoongo ki ai ‘a e tokolahi ‘i he fonua pe ‘e toki fakaikiiki atu ‘e he ongoongo ni ‘a e tu’utu’uni 'a e Tu'i Fakamaau Lahi.

Ko e Fakafofonga Lao ma’a e Tongasat ko William Edwards Jr. pea ko Dr. Rodney Harrison ma’a ‘Akilisi Pohiva mo e PSA.