‘E toe hā ‘Akosita mo ‘Etuate Lavulavu ‘i he Fakamaau’anga ‘aho 26 Ma’asi Featured
5 Ma’asi, 2018. Kuo tukuange ‘a e Minisitā Ki he Ngaahi Ngāue Fakalotofonua ‘Akosita Havili Lavulavu (33) mo hono hoa ‘Etuate S. Lavulau (59) mei hono tauhi fakalao pea kena toe hā ‘i he Fakamaau’anga ‘i he ‘aho 26 ‘o Ma’asi ni.
Na’e puke foki ‘a ‘Akosita Havili Lavulavu mo ‘Etuate S. Lavulavu ‘o tauhi fakalao ‘i he ‘aho Tokonaki 3 ‘o Ma’asi pea tukuaki’i ki he ngaahi hia kehekehe ‘o kau ai ‘a hono ma’u ‘a e pa’anga he fakamatala loi, ngāue he founga kākā ke ma’u ai ha pa’anga mo e ngaahi tukuaki’i fekau’aki kehekehe pe.
‘Oku fekau’aki ‘a e tukuaki’i ko’eni mo e pa’anga ‘e laukilu na’e ma’u mei he tokoni ‘a e Pule’anga ki he ‘apiako ‘a ‘Akosita Havili Lavulavu mo ‘Etuate S. Lavulavu na’e ‘iloa koe ‘Unuaki ‘o Tonga Royal Institute ka ‘oku ‘ikai ke toe lele ‘i he ‘aho ni.
‘Oku fakafofonga’i fakalao ‘a ‘Akosita Havili Lavulavu mo ‘Etuate S. Lavulavu ‘e Siosifa Tu’utafaiva pea ‘oku mahino mai ‘oku na tali tonuhia ki he tukuaki’i ko’eni.
