Tu’utu’uni Fakamaau’anga Tangi ke mavahe Feohi’anga Mo’ui Fo’ou mei Ha’ateiho ^Featured

Friday, 16 December 2016 13:19
2 comments

Falelotu Siasi Tokaikolo 'Ia Kalaisi i Ha'ateiho na'e tu'utu'uni 'e he Fakamaau'anga Tangi ke mavahe mei ai 'a e Mo'ui Fo'ou

16 Tisema, 2016. Kuo tu’utu’uni ‘e he Fakamau’anga Tangi ‘i he ‘aho 15 ‘o Tisema ni ke mavahe ‘a e Feohi’anga Mo’ui Fo’ou mei he koloa ‘a e Siaisi Tokaikolo ‘ia Kalaisi ‘i Ha’ateiho.

Ko e tu’utu’uni ‘eni ‘a e Fakamaau’anga Tangi ‘i ha tangi ‘a e Mo’ui Fo’ou ‘ia Kalaisi fekau’aki moe Tu’utu’uni ‘a e Fakamaau’anga Lahi ‘i he ‘aho 9 ‘o Novema 2016 kenau mavahe leva mei he koloa ‘a e Siasi Tokaikolo ‘Ia Kalaisi ‘a ia na’a nau fakatonutonu ai ‘i he Fakamaau’anga Lahi.

‘Oku mahino foki kuo fakahū atu ha tangi a e Mo’ui Fo’ou ki he Fakamaau’anga Tangi ‘a ia ‘e toki fakahoko ki he mahina ko Ma’asi 2017.

Lolotonga ‘eni na’a nau tangi ki he Fakmaau’anga Tangi ke tukuange kenau nofo pe mo ngāue’aki ‘a e koloa ‘i Ha’ateiho kae ‘oua kuo mahino ‘a e ola ‘o e Tangi koia.

Na’e ‘ikai tali ‘eni ‘e he Fakamaau‘anga Tangi ‘i he tu’utu’uni ‘aneafi 15 ‘o Tisema pea kuopau ai kenau fetukutuku leva ‘o fakahoko pe mei tu’a ‘enau tangi.

Kuo ma'u ha fakaha mei he Siasi Tokaikoloa 'Ia Kalaisi kuo fakahoko 'a e fetukutuku 'a Mo'ui Fo'ou 'Ia Kalaisi mei he'enau koloa 'i Ha'ateiho.