“ MĀLŌ E FAKA-MANATU MAI, HAFOKA...Mālie ko hono 'ohake 'a e ki'i "photo-op" ko 'eni 'a Lavulavu mo e kau Siainá. 'Oku nau kei kui 'i he Potungāue Taki Mamatá ko e fakahā mai e ngaahi aleá ni, ka 'oku te'eki ai ketau sio ki hono olá. 'Oku 'ifē 'a e kakai Siaina na'e talamai tenau tau mai he ta'ú ni?
'Oku te'eki kenau tali 'a e fakamatala 'a e ngaahi fakatotolo faka-pa'anga (financcial research) mo e faka-pisinisi (business research). Ko e kakai faingofuataha kenau omi 'eve'eva ki Tongá ni ko e kakai Tongá mo honau ngaahi fāmili nofo mulí. Ko e kau folau 'eve'eva mulí 'oku ta'e pau 'enau ngaahi palaní he 'oku pule'i kinautolu 'e he ngaahi faingata'a faka-pa'angá, faka-'ekonōmiká, mo e faka-pisinisí (inflation, unemployment, currency devaluation, natural disasters, and home-front risks, etc).
'Oku omi 'a e kakai Tongá nofo-mulí ia he 'oku 'i ai 'enau ongo'i 'a honau fonuá na'a nau tupu hake aí. Neongo 'a e tōnounou faka-pa'angá, 'e kei omi pē 'a e kakai Tongá ia ki he ngaahi kātoanga faka-ako, faka-fāmili, faka-lotu, mo e faka-fonuá. Ko e kakai mulí 'e toki faingamālie faka-pa'anga pea tenau toki folau mai.
'Oku ou tui ange ki he tu'uaki mei he ngaahi fakatotolo faka-pisinisi, 'oku ma'ulalo 'a Tonga 'i hono faka-tatau ki he ngaahi kaungā'api 'i he Pasifikí: Tahiti, Hawai'i, Fisi, Vanuatu, Ha'amoa, mo Rarotongá: (1) 'Oku mama'o ange 'a Tonga; (2) 'oku lahi ange 'a e ngaahi hōtele lelei mo e founga taki-mamata lelei ange 'a e ngaahi kaungā'apí; (3) pea 'oku laka mama'o 'a 'enau tali-'eve'evá (service).
Ko e tali maheni 'a e Potungāue Taki Mamatá 'i hono fehu'ia 'o kau ki he kakai Tonga nofo mulí: (1) 'Oku 'ikai falala'anga 'a e kau Tonga 'eve'eva mai mei mulí; (2) 'oku nau omi kinautolu 'o nofo mo honau ngaahi fāmilí 'o 'ikai kenau fakamole 'i he ngaahi tali'anga 'eve'evá; (3) 'Oku 'ikai kenau fakamole hangē ko e kau papãlangí, kau Siapaní, mo e kau Siainá, etc.
Na'a nau 'oho vale 'i he tokolahi fau 'a e kakai Tonga nofo muli na'a nau omi ki he Hilifaki Kalauni 'o e ta'ú ni. Na'a nau tala faka-'ohovale ko e tokolahitaha ia 'o e kau 'eve'eva na'e 'a'ahi mai. 'A ia na'e totonu ke lahi ange pea taafataha 'enau tu'uaki 'o e Hilifaki Kalauní ki he kakai Tonga nofo mulí. ”