Fakamāfana ‘a e tali mei he Tama Tu’i mo e Fakataha Tokoni – KFFF ^Featured

Na’e ‘autaki mai foki ‘aneafi ‘aho 25 ‘o Fepueli 2019 ha tohi kehekehe ‘e 3 ‘o fakatu’asila mai kia Lord Nuku, Sione Teisina Fuko pea mo Williami Clive Edwards mie he Fakataha Tokoni 'a 'Ene 'Afio..

Ko e ngaahi tohi foki ko’eni ‘oku tatau pe honau kanotohi pea koe fakahoko fakahangatonu mai ia mei he ‘Eiki Tauhi Sila Faka-Tu’i (Lord Privy Seal) Viliami Malolo.

Na’e fakatu’asila mai foki ‘a e ngaahi tohi ko’eni ki he ngaahi hingoa ko’eni ‘e tolu he ko kinautolu na’a nau fakahū atu ‘a e tohi tangi ‘e 3 ko’eni ‘a ia ko Sione Teisina Fuko na’ane fakahū atu ‘a e tohi tangi ‘a e kakai ‘o e fonua, Lord Nuku na’a ne fakahū atu ‘a e tohi tangi ‘a e Hou’eiki Nōpele pea ko William Clive Edwards na’a ne fakahū atu ‘a e tohi tangi ‘a e kau Memipa Fale Alea mo Kapineti malōlō.

‘I ha fakamatala ‘a e sea ‘o e KFFF Sione Teisina Fuko na’a ne pehe ai koe tohi tali mei He’ene ‘Afio na’e fokotu’u mai ai ‘oku lolotonga fakahoko ‘a e ngāue ki he ngaahi tangi ko’eni pea ‘oku ‘ave ki he Komiti Fakafakamaau ‘a e Fakataha Tokoni pea ‘e toki fakafoki mai leva ha’anau lipooti ki he Tu’i mo e Fakataha Tokoni ke fakahoko hano aofangatuku.

‘I he lau ‘a Fuko ‘oku ne pehe ‘oku ‘ikai hano tatau ‘a e fiefia ‘a e KFFF he mahino mai ‘oku ‘i he levolo faka-palofesinale ‘a e ngaue ko’eni ‘a e Fakataha Tokoni pea ‘i ai ‘a e toka’i, faka’apa’apa mo e fie ngāue fakasēvaniti ma’ae kakai pea ‘oku fou pē ‘i he founga totonu pea toe hulu atu ko hono fakahoko ‘a e ngāue ki he tangi ‘a e kakai ‘o e fonua.

“Ko e tangi ki he Fale Alea ‘oku fakangatangata pe 'a e ngāue ia kiai ka koe talamai pe ke fakatokanga’i pea ko’ene ‘osi ia ‘a ia koe ‘uhinga ia ‘emau tangi ki he Tama Tu’i pea ‘oku ta’e hano tatau ‘emau fiefia mo e kakai ‘oku mau fakafofonga’i”, koe fakamatala ia ‘a Fuko.

‘I he lau ‘a William Clive Edwards na’a ne pehē ai ‘oku hangē ha lolo kuo lilingi ki ha tahi hou ‘a e fakanonga ‘a e tali ko’eni pea ‘oku ‘i He’ene ‘Afio mo ‘Ene Fakataha Tokoni ke toki aofangatuku ha tu’utu’uni kiai ‘a mui pea koe me'a kehe ia ka ko e fa’ahinga tali ‘eni ‘oku fieongo kiai ‘a e kakai ‘o e fonua ka ‘oku ‘ikai koe ‘uluaki tukuaki’i, tafulu’i mo fakamanamana’i e kakai ‘oku ‘i ai enau totonu faka-Konisitūtone ke tangi ‘o hange koia ‘oku toutou fakahoko mai ‘e he Pule’anga.

Ko e ongo tatau na’e fakahoko mai ‘e Leatu’u Prescott koe taha ‘o e kakai ‘oku nau poupou ki he tangi ko’eni ‘a ia na’a ne fakahā ‘ene fiefia mo ‘ene ongo’i hono Tonga he mahino ‘oku kei ‘ofa ‘a e Tu’i hono kakai pea koe me’a ki mui ‘a e ola ka koe feveitoka’i’aki ‘oku mahino mai ‘oku tau kei ‘i Tonga pe pea ‘oku kei malu pe ‘a e fonua ko e ‘i he malumalu ‘o e Tu’i.

Ko e toki tali mai foki ‘eni ‘a e tohi tangi ‘a e KFFF ka na’e tuku mai foki ‘e he Pule Le’ole’o ia ‘o e Televīsone Tonga Setita Tui’onetoa ‘i he mītia faka-sosiale ‘o pehe na’e fakafoki mei he Tu’i mo e Fakataha Tokoni ‘a e tohi tangi ‘a e KFFF ke ‘ave ki he Fale Alea mo e Fakamaau’anga ‘a ia ‘oku ‘ikai mo’oni ‘eni.