“ 'Oku mahu'inga ke tu'u tau'ataina 'ae Potungaue Takimamata koe'uhi kae tonu e ngaahi visione. Ko 'etau fa'unga fakapolitikale he lolotonga ni 'e faingata'a ke tau filifili ha taha ki ha lakanga Minista, ka ko kinautolu pe kuo fili mai he kakai (tukukehe ka loto e Palemia ke fili mai ha ni'ihi mei tu'a ne 'ikai fili 'ehe kakai e fonua). Ka 'e fu'u mahu'ingaage ha taha kihe Minisita Takaimamata 'oku lava 'o ngaue fakataha moe ngaahi kautaha fakatakimamata taautaha e fonua kae lava ke ma'anu e ngaue ni. Koe lelei ka hoko 'a Semisi Sika koe Minista e Takimamata he 'oku lolotonga ngaue vaofi pe ia moe sekitoa ni he lolotonga ni pea 'oku 'iai e mahino lahi 'oku 'iate ia 'o fekau'aki moe sekitoa takimamata moe kau pisinisi Tonga 'oku nau fakakaungatamaki ai.
Koe palopalema lahi moe Poate Takimamata ne Sea ai 'a Ross Chapman he na'a nau tu'usi (disconnect) 'e kinautolu ha toe vaa ngaue moe sekitoa taautaha pea 'osi e ta'u 'e meimei 3 'enau faifatongia mo nau fakamoleki e laui miliona lahi ka ne 'ikai ha ola lelei 'e taha kuo ma'u mei ai! Koe tefito'i fatongia foki e Poate ko 'eni ko hono fakamaketi'i e takimamata moe folau 'eve'eva ki tu'apule'anga. Koe ha e me'a ne hoko he ta'u 'e 3 'enau fakamaketi? Holo e Takimamata pea faingata'a'ia e ngaahi pisinisi takimamata kae tautefito ki he ngaahi pisinisi 'oku lolotonga ta 'enau no he ngaahi pangike. Koe Sea lolotonga e Poate ko 'eni ko Tomifa Paea pea koe tangata ngaue ia 'o Vava'u Lahi. 'Oku 'ikai koe palopalema 'ene hotele ko 'ene fo'ui 'ata'ata pe 'a'ana ka 'oku toe kau lahi atu kiai e founga moe kau fakamaketi 'oe Poate Takimamata he ko kinautolu kuo totongi 'ehe pa'anga tukuhau e kakai e fonua ke nau 'omai e folau 'eve'eva ki he ngaahi hotele.
'Oku kei lahi pe ngaahi fakaanga 'e ni'ihi mei tu'a koe 'ikai ke mahino'i e tefito e palopalema 'oe Takimamata hotau fonua ni. ”