“ Mālō Tukulalo...Ko e fatongia mahu'inga 'e taha 'o e Konisitūtoné ketau lau ki aí, ko e ta'ota'ofi e mafai 'o e Pule'angá, mo 'enau fanga poné. Na'e 'omai 'e Tupou I, mo Misi Peka, pea mo e loea 'i 'Aositelēlia ko St. Julian (1875) 'a e ngaahi kongokonga mahu'inga mei he Konisitūtone 'o e Pule'anga faka-Tu'i 'o Hawai'í (1839), 'a ia na'e unga 'i he Konisitūtone 'Ameliká (1776).
Mahu'inga ai 'a hono faka-ngatangata 'o e mālohi mo e mafai 'o e Pule'angá kenau to'o ta'e fakalao 'a e tau'atāina 'a e kakaí. Kau ai mo e feinga ma'upē 'a e Pule'angá kenau mapule'i 'etau tau'atāina leá, fa'ahinga tohi 'oku tau fie lautohí ai, mata faivá he TV pe ko e Ngaluopé, pe ko 'etau fie pulusi ha'a tau ta'anga pe fa'utohi. Ko e tau'atāina ia 'oku tau lava ai 'o ako ha ngaahi me'a fo'ou pea fakalakalaka ai hotau 'atamaí.
(1) 'Oku 'ikai nonga e Pule'angá ka e 'oleva pē kuo nau mapule'i kitautolu 'o hangē ha'a nau fãnau valevalé (paternalism). (2) 'Oku nau poto ange pē kinautolu, pea 'oku tau vale kitautolu he ko e tamai kinautolu, ka e fānau valevale kitautolu. (3) 'Oku nau fiema'u ketau nofo pe he vale-ngangaú koe'uhi ketau fili ma'upē 'ia kinautolu ki Fale Aleá.
Ko ia 'oku totonu ketau hu'uhu'u ma'upē 'i he talamai 'oku nau fie "malu'i 'etau fānaú mo e kakai fefiné" mei he ngaahi me'a fakalieliá. Hili ko ia, ko e tokolahi 'o e kau taki 'i he Pule'angá kuo nau fanafanau tu'utāmaki holo; mahalo ko kinautolu 'oku tõtu'a 'enau faka-lieliá. ”