“ Mālō Kilioni...Tau vakai ange ki he fakapotopoto mo e 'uhinga totonu 'a ho'o laú: (1) 'Oku sai e lao ko 'ení; (2) Ta'ota'ofi e tufaki e polokalama faka-lieliá 'i he Ngaluopé (Internet); (3) Ke 'oua 'e uesia 'etau fānaú mo honau 'atamaí; (4) temokalati pē ka e kei ngāue'aki 'a e fo'i 'ulu fōlahí, 'ikai ko e fo'i 'ulu fōsi'i.
1. 'Oku ke loto lelei ki ha fa'ahinga lao pē 'e to'o ai ho'o tau'atāina leá mo e fakahā-lotó 'oku le'ohi mo malu'i 'e he Konisitūtoné?
2. 'Oku ke 'ilo 'oku 'i ai 'a e founga ke " mapule'i 'e he mātu'á" (parental control) 'i he komipiuta kotoa, 'o a'u ki he ngaahi telefoni to'oto'ó (smart phones), ke ta'ofi e ngaahi polokalama faka-lieliá? 'Oku totonu ke ako ki ai 'a e mātu'á ko honau fatongia.
3. Kohai ia e mātu'a tenau faka-ngofua ha polokalama ki he 'enau komipiuta 'i honau 'apí, pē ko e ngaahi telefoni to'oto'ó 'a e fānaú, ke "uesia ai 'a e fānaú mo honau 'atamaí?" 'I he ta'e tokanga 'a e mātu'á ke malu'i 'enau fānaú, 'e mole ai 'a e totonu tau'atāina 'a e kakaí faka-lūkufuá.
4. 'Oku ta'e fe'unga kiate au ho'o 'omai e lea faka-lielia ko e "fo'i 'ulu fōsi'í" ki he faka-mafola 'i he Ngaluopé. 'Oku totonu ke ta'ofi ho'o tohí 'e he 'ētitá, pea faka'ilo koe 'i he lao fo'oú ko ho'o 'omai e fakamatala faka-lieliá ki he Ngaluopé.
Kā 'e mole ai ho'o tau'atāina leá kuo le'ohi mo malu'i 'e he Konisitūtoné, neongo 'oku faka-lielia ia kiate au mo 'eku fānau 'oku nau lau 'a e Nepitunó. Na'e 'eke mai 'e hoku 'ōfefine ta'u 13 pe koehā 'a e "fo'i 'ulu fōsi'i?" Na'a ku fu'u 'ohovale, pea u fakamatala ange 'a hono 'uhingá; talamai leva 'e he ta'u 13 'oku faka-lielia 'etau talanoa 'i he Ngaluopé.
'Oku ke fiema'u 'a e temokalatí, ka 'oku ke loto ke fa'u pē 'e he Pule'angá 'a e lao teke loto ki aí. 'Ikai 'oku totonu ketau lototaha ki he le'ohi mo e malu'i 'a e Konisitūtoné? Teu kei poupou'i ai ho'o totonu ke 'omai e lea faka-lieliá ki he Ngaluopé.
Ka 'oku 'i ai 'a e taimi totonu mo e feitu'u totonu ki hono faka-'aonga'i 'o e lea faka'apa'apá, pea ketau fetoka'i 'aki. ”