Hokohoko atu foaki tokoni naunau fakavavevave ‘a ‘Aositelelia ki Tonga ^Featured

Ko e tokoni ko eni ko e konga ia ‘o e tukupa ‘a ‘Aositelelia ke kei hokohoko atu hono tokonia ‘a e fakaakeake ‘a Tonga mei he mapuna ‘a e mo’unga afi Hunga -Tonga Hunga -Ha’apai kae pehe foki ki he peaukula ‘I he 15 ‘o Sanuali, 2022.

‘Oku fe’unga fakakatoa ‘a e tokoni ko eni ki he sekitoa ma’u’anga ivi ‘uhila mo e $800,000 ‘o kau ki ai e ngaahi naunau ngaue faka’uhila mo e ‘u pou ‘uhila. ‘Oku toe leva e naunau fe’unga mo e $500,000 ‘e toki tau mai ia ki Tonga ‘i he faka’osinga ‘o ‘Aokosi ‘o kau ki ai ‘a e ‘u transformers ‘e 8 mo ha misini generator lahi. ‘I he hili ‘a e mapuna ‘a e mo’unga afi mo e peaukula, na’e toe fetuku atu foki ‘e he HMAS Canberra ha tisolo lita ‘e 20,000 ke tokoni ki hono fakahoko e ivi ‘uhila ‘i ‘Eua, Ha’apai pea mo Vava’u.

Na’e fakahikihiki’i foki ‘e Shelly Thomson, ko e Sekelitali ‘Uluaki ‘a ‘Aositelelia ‘a e to’ofohe ‘a e kau pule mo e kau ngaue ‘a e Kautaha ‘Uhila ‘a Tonga mo e ngaahi hoa ngaue kae pehe foki ki he’enau ngaue ‘aufuato ‘i he hili ‘a e fakatamaki. Na’a ne toe fakamamafa’i foki ‘a e mahu’inga ‘o e ivi ‘uhila ki he kakai ‘o e fonua mo e ngaahi ngaue fiema’u vivili.

“Lolotonga e fiema’u ‘e he ngaahi famili tonu ‘o e kau ngaue ‘a e Kautaha ‘Uhila ‘a Tonga ‘enau tokoni mo tokangaekina kinautolu mo honau ngaahi ‘api, na’a nau feilaulau’i ia ka nau tokoni fakavave ki hono vakai’i e maumau na’e hoko, fufulu e ngaahi naunau ‘uhila mo e laini tufa mo fakalelei’i e ngaahi ma’u’anga ‘uhila ke fakasi’isi’i e maumau mo fakahoko e ma’u’anga ‘uhila ki he ngaahi famili mo e ngaahi tukui kolo ‘i Tonga.”

“’Oku ou faka’amu ke fakatokanga’i ‘a e ngaue kuo feia ‘e he kau ngaue ‘a e Kautaha ‘Uhila ‘a Tonga mo e ngaahi hoa ngaue, ‘o malava ai ‘i he’enau ngaue ‘osikiavelenga ‘o fakahoko kakato e ma’u’anga ivi ‘uhila ki he kakai ‘o Tonga ‘i he ‘aho Falaite 21 ‘o Sanuali ‘a ia ko e ‘aho pe ia ‘e ono mei he fakamatamaki,” ‘i he fakamatala‘a Shelly.

‘Oku hokohoko atu ‘a e tokoni ‘a ‘Aositelelia ki Tonga ke toe malu ange mo matu’uaki ‘e he laini ‘uhila ‘a e ngaahi fakatamaki, mo fakamalohia e ngaahi taumu’a ma’u’anga ivi fakafo’ou ‘a Tonga ‘o fakafou ‘i he ngaahi ‘inivesimeni hange ko e:

– AUD $9.5 miliona ki he Outer Island Renewable Energy Project (OIREP), ‘a ia ko hono fakalelei’i e laini ‘uhila ‘i ‘Eua, Ha’apai mo Vava’u pea fokotu’u foki mo e ma’u’anga ivi mei he la’aa ‘i ha ngaahi ‘otu motu ‘e hiva;

– AUD $3.5 miliona ki he Tonga Renewable Energy Project (TREP) ke ma’u ‘e he kakai Tonga ha ma’u’anga ivi ‘uhila ‘oku faingofua mo lahi ange pea fenapasi mo e ‘atakai, matu’uaki e loa mo ma’ama’a ange; mo e

– AUD $5.3 miliona ki he ‘Elia fika 3 ‘o e Nuku’alofa Newtork Upgrade Project (NNUP)

Ko e ngaahi va fengaue’aki taimi loloa ko eni, fakataha mo e ngaahi tokoni naunau fakavavevave, ‘oku ne faitokonia e Pule’anga Tonga mo e TPL ‘i he’ene ngaue ke faka’ai’ai ha ma’u’anga ivi ‘uhila ‘oku ne matu’uekina e ngaahi fakatamaki.

.