Lava kakato taimi ngāue Tu’i Fakamaau Lahi Owen Paulsen ma’a Tonga Featured
Tu’i Fakamaau Lahi Malōlō ‘a Tonga Owen Paulsen
29 July, 2019. Kuo lava kakato ‘a e taimi ngāue ‘o e tangata'eiki Nu’usila ko Owen Paulsen ‘a ia na’a ne hoko koe Tu’i Fakamaau Lahi, Palesiteni ‘i he Fakamaau’anga Tangi mo e Fakamaau’anga Kelekele ‘i he fonua talu mei he ta’u 2015.
Na’e fili foki ‘a e Tu’i Fakamaau Lahi Malōlō ‘a Tonga Owen Paulsen ki he lakanga ni ‘i he ta’u ‘e 4 talu mei he ta'u 2015 pea koe kakato ‘aki ‘eni ‘ene aleapau ngāue pea pau ai ke foki ai ki Nu’usila ko e ‘uhi koe lakanga faka-Fakamaau fo’ou kuo toe ui ia kiai.
Ko Paulsen foki mei he motu Saute ‘o Nu’usila mei he vahenga Christchurch pea ko’ene foki ko’eni ki Nu’usila kuo fokotu’u ia ki he lakanga Fakamaau (Associate Judge) ‘i he Fakamaau’anga Lahi (High Court) ‘a Nu’usila.
Na'e ma’u foki hono faka’ilonga LLB mei he ‘Univesiti ‘o Canterbury ‘i he ta’u 1986 pea ne kamata ngāue fakalao ai pe ‘i he ngaahi kautaha lao 'iloa kehekehe ‘i Christchurch ‘o kau ki ai ‘a e Harman & Co mo e Cavell Leitch Law.
Na’e toe ma’u foki mo hono faka’ilonga LLM (Hons) mei he ‘Univesiti ‘o ‘Aokalani ‘i he ta’u 2001 pea fokotu'u ia ki he lakanga Fakamaau 'i Nu'usila kimu'a pea toki ui ia ki Tonga ni.
Lolotonga ‘a e fai fatongia ‘a Paulsen ki he fonua na’a ne hoko ai koe fale’i ki he Fakataha Tokoni ‘a ‘Ene ‘Afio tautautefito ki he ngaahi kaveinga fekau’aki mo e kelekele.
Na'e 'iloa 'a Paulsen 'i he vaha'a taimi na'e fakahoko fatongia ai 'i Tonga ni 'i he tātātaha ke toe liliu 'ene ngaahi tu'utu'uni 'e he Fakamaau'anga Tangi.
