Ko'ene tuku pe faihala ko e si'isi'i ange ia 'a e longoa'a ^Featured

 'Etita,

'Oku ou kole keke anga lelei kae fakahu atu 'a e ki'i tohi nounou ko'eni ki ho'o kolomu.

'Oku tau a'u mai 'eni ki he taimi na'a tau pehe 'e si'isi'i ange ai 'a e longoa'a tautautefito ki he sipoti mo e me'a fakapolitikale.

Ko e me'a pe 'oku tau 'ilo 'oku toe fakalalahi ange 'a e longoa'a he 'aho ni pea 'oku faka'ohovale he na'a ku pehe 'e au 'e 'ikai toe fu'u fai ha longoa'a hili 'etau liliu fakapolitikale.

Na'a ku fiefia he toutou uki ke lotu e fonua mo 'aukai pea 'oku a'u mai ki he tu'unga 'oku ou fakakaukau fakaeau pe koe lahi ange 'a e lotu 'aukai koe lahi ange ia 'a e longoa'a mo hono tukuaki'i 'a e faihala 'a e kau ma'u mafai.

'Oku 'ikai keu tui au 'etita koha lotokovi hono fakaanga'i e kau taki pea 'oku ou tui pe au 'oku 'ikai ha taha 'e haohaoa ka koe tokoni ki he'enau fai fatongia pea fakatokanga kenau fakamam'o mei he faihala.

'Oku ou tui kapau 'e faitotonu pe fatongia pea fakamama'o mei he faihala koe nonga ia 'a e fonua pea tau melino he ko Tonga ko e fonua fiefia.

Fai e lotu ke mo'oni kae fakahinohino lelei mai 'e he 'Otua e hala ketau fou ai pea 'e si'isi'i ange ai 'a e longoa'a.

'Ofa Atu,

Taulanga Mei he Lolo