‘Ikai mo’oni fakamatala 'a Lopeti Senituli na’e ‘osi fokotu’u Komisiona Tau’i e Faihala Featured
Fale'i 'a e Palemia Lopeti Senituli
4 ‘Epeleli, 2019. Kuo faka’ikai’i mamafa mei he ngaahi kupu fekau’aki ‘o a’u ki he ni’ihi ‘o kinautolu na’e ngaue ‘i he ngaahi mafai ma’olunga ‘i he Pule’anga ‘a e fakamatala ‘a e Fale’i ‘a e Palemia Lopeti Senituli ‘o pehe na’e ‘osi fakanofo ‘a e Komisiona ke Taui’i ‘a e Faihala (Anti-Corruptions Commissioner) ‘i Tonga ni.
‘Oku mahu’inga foki ‘a e kaveinga ko’eni he ‘oku totonu mo taau ke ‘ave ‘a e fakamatala mo’oni ki he kakai.
Na’e fakahoko foki ha polokalama ‘a e Fale’i ‘a e Palemia pea na’e fakamafola mai ‘i he Letio 87.5 'i he uike kuo 'osi pea na’a ne fakamatala ai fekau’aki mo e kaveinga ni.
‘Oku mahino foki na’e ‘osi fakapaasi ‘a e Lao ki he hono Tau’i ‘o e Faihala (Anti-Corruptions Act) ‘i he ta’u 2007 ka na’e te’eki ke fili ha Komisiona pea na’e te’eki ke ‘i ai hano patiseti.
‘Oku malie foki he na’e fakamatala ‘a Lopeti Senituli na’e ‘osi fakanofo ‘a e tangata muli ko Neil Adsett ki he lakanga Komisiona ke Tau’i ‘a e Faihala (Anti-Corruptions Commissioner).
‘Oku mahino foki ko Neil Adsett na’e hoko koe ‘Ateni Seniale ‘i he fonua ‘i he lolotonga ‘a e Pule’anga ‘o Tu’ivakano ka na’e te’eki ‘i ai ke fakanofo ia ki he lakanga ko e Komisiona Tau’i ‘o e Faihala ‘o hange koe fakamatala ‘a Senituli.
Ko e fuofua Komisiona kuo ‘osi fili mo fakanofo ki he lakanga ni ko e tangata loea ko Kahu Afeaki ‘a ia na’e fakanofo ‘e he Fakataha Tokoni ‘o fakatatau ki he mafai kuo foaki ‘e he Konisitutone 'i he ta'u 2015.
Kaikehe koe talu hono fokotu’u ‘o e matapule ko’eni ki he lakanga ni mo e te’eki pe ke vahe’i ‘e he Pule’anga ia ‘o e aho ni ha pa’anga kae kamata ngaue ‘a e sino mahu’inga ko’eni.
Na'e fakamatala foki 'a e Minisita Lao 'o e 'aho ni Vuna Faka'otusia 'i he feme'a'ki 'a e Fale Alea 'i he mahina ko 'Okatopa 2015 'oku fu'u ma'olunga 'a e vahenga 'oku fokotu'u ki he Komisiona Tau'i Faihala.
‘Oku lahi ‘a e longoa’a ‘i he fonua ‘i he ngaahi ‘aho ni pea lahi mo hono tukuaki’i ‘a e kau taki ki he faihala pea ‘oku ‘uhinga lahi ‘eni koe ‘ikai ha sino tau’ataina kene fakahoko ‘a e ngaue ko’eni.
‘Oku hu mai foki ‘a e Komiti Fakafonua ki hono Fakafepaki’i Faihala (KFFF) ‘o teke ‘a e kaveinga ko’eni pea iku ai ke fakahoko ‘a e tu’utu’uni mei he 'Ene ‘Afio ‘o fakatatau mo hono mafai kuo foaki ‘e he Konisitutone ki he Pule’anga ke fokotu’u ‘a e sino ko’eni pea ke kamata ‘i he ‘aho 1 ‘o Siulai 2019.
Ko e ngaahi fakatata mahino ia na’e teeki ke fokotu’u ha taha ki he lakanga ko’eni kimu’a pea na’e ‘ikai ke hoko ‘a Neil Adsett koha Komisiona Tau’i ‘o e Faihala ‘o hange koe fakamatala ‘a e Tangata Fale’i ‘a e Palemia.
