Faka'ikai'i 'e he KFFF 'a e fakamatala loi na'e fakafoki 'enau Tohi Tangi Featured
Sione Teisina Fuko Sea KFFF mo William Clive Edwards Memipa mo Fale'i KFFF
21 Fepueli, 2019. Kuo faka'ikai'i fefeka 'e he Komiti Fakafonua ki hono Fakafepaki'i 'o e Faihala (KFFF) 'a e fakamatala kuo tuku mai 'e he Tokoni Pule 'o e Letio Tonga Setita Tui'onetoa 'i he mitia faka-sosiale 'o pehe ai kuo fakafoki mei he Tu'i 'a e tohi tangi 'a e kakai na'e tataki 'e he KFFF.
Ko e fakamatala foki 'a Tui'onetoa 'oku pehe na'e fakafoki 'a e tohi tangi 'a e KFFF mei he Tu'i ke 'ave ki he Fale Alea mo e Fakamaau'anga.
Na'e faka'ikai'i mamafa 'eni 'e he Sea 'o e KFFF Sione Teisina Fuko 'a e fakamatala ko'eni 'o pehe 'oku loi pea 'ikai mo'oni pea ko hono takihala'i 'eni 'o e kakai 'e he kau poupou 'o e Pule'anga 'a ia 'oku nau feinga ke fakamele'i 'a e ngaue mafakatukituki mo faka-Konisitutone na'e fakahoko 'e he KFFF mo e kakai tokolahi 'i he funga 'o 'enau totonu faka-Konisitutone.
"'Oku malie foki he na'e 'osi pulusi mai 'e he Tokoni Pule 'o e Letio Tonga Setita Tui'onetoa 'a e fakamatala ko'eni 'i he mitia faka-sosiale pea na'e 'osi fakahoko mai 'e he tokolahi kiate au kimu'a pea ne toki telefoni mai ke 'eke kiate au 'a ia koe founga 'eni 'oku ou fehu'ia lahi 'a e tu'unga faka-polofesinale 'o e kakai pehe ni 'oku 'omi ke ngaue 'i he Letio mo e Televisone 'a e Pule'anga" ko e fakamatala ia 'a Fuko.
'I he hoko atu a Fuko na'a ne pehe ai 'oku 'ikai mo'oni 'a e fakamatala ko'eni pea 'oku 'ikai ke anga pehe 'a e founga ngaue ia 'e Tu'i mo 'Ene Fakataha Tokoni ka 'oku fakaofo 'a e 'omai 'e he kakai 'oku nau poupou ki he Pule'anga mo e PTOA 'enau fiema'u mo honau loto 'i he founga 'oku 'ikai lelei ke hoko atu 'aki hono lohiaki'i 'o e fonua.
Na'e pehe 'e Fuko kuo 'osi fakahu 'a e tohi tangi ki he Tu'i pea kuo lava honau fatongia mo e kakai ka 'oku 'i he mafai 'o e Tama Tu'i 'a e me'a kotoa pea kuo lava 'a e fatongia 'o e KFFF mo e kakai na'a nau poupou kiai pea na'e fakahoko 'i he founga melino mo fakalao.
Kuo tufaki foki 'a e ongoongo mo e fakamatala ko'eni 'o taki 'e Tui'onetoa 'i he mitia faka-sosiale pea kuo faka'ikai'i mamafa mai 'eni 'e he Sea 'o e KFFF 'oku 'ikai mo'oni 'a e fakamatala ko'eni.
