Fiema'u kau Ngaue Potungaue Ako ke fakamavahe'i 'a Piveni Piukala mo Siaosi Pohiva Featured
Piveni Piukala mo Siaosi Pohiva
30 Sanulai, 2019. Kuo tuku mai foki 'i he ongoongo 'a e Letio 87.5 'a e fakataha 'a e 'Eiki Minisita Ako mo e kau ngaue 'a e Potungaue ako na'e fakahoko 'aneafi 'o makatu'unga ai pe 'i he ta'efiemalie 'a e kau ngaue 'a e Potungaue Ako ki he tu'utu'uni 'a e Minisita Penisimani Fifita ke fakamalolo'i 'a e CEO 'a e Potungaue Claude Tupou.
Na'e fakahoko foki 'a e tohi launga 'a e kau ngaue 'o e Potungaue Ako 'o takimu'a ai 'a e kau 'ofisa ma'olunga 'o e Potungaue 'o 'oatu ki he Minisita Ako 'a 'enau fiema'u ke fakafoki mai 'a Claude Tupou ki hono lakanga.
'Oku mahino foki koe makatu'unga 'o hono fakamalolo'i 'o Calude Tupou koe 'ikai tokua ke lelei hona va fengaue'aki mo e Minisita Ako pea 'oku makatu'unga foki 'eni 'i he feinga 'a e Minisita Ako ke fakahoko 'a e konituleki 'a e matapule koe kaungame'a ofi 'o e Palemia mo hono foha Siaosi Pohiva pea koe tangata poupou fefeka 'o e PTOA ko Piveni Piukala.
Na'e 'ikai foki ke tui 'a Tupou ki he founga na'e 'amanaki ke fakahoko'aki 'a e konituleki ko'eni he 'oku 'ikai muimui 'i he lao mo e founga ngaue 'a e Pule'anga.
Ko Piukala foki na'e hoko ai 'a longoa'a 'a e Potungaue Ako mo e fonua 'i he sofware na'e totongi kiai 'e he Potungaue Ako 'a e pa'anga laka hake 'i he kilu ka 'oku kei fehu'ia hono 'aonga 'o a'u mai ki he 'aho ni.
'Oku mahino mai foki koe fakataha ko'eni 'a e Minisita Ako mo 'ene kau ngaue akatatau ki he lipooti 'a e Letio 87.5 na'e mahino mei ai 'a e loto 'a e kau ngaue 'o e Potungaue 'i heenau fokotu'u ki he Minisita 'oku nau loto ke fakamavahe'i 'a Piveni Piukala mo Siaosi Pohiva mei ha'a na toe kaunga ki ha ngaue 'a e Potugaue Ako he 'oku lahi 'ena maumau 'oku fakahoko.
Na'e toe na'ina'i foki 'a e kau ngaue 'a e Potugaue ke fakahoko ha ngaue fakavavevave ke fakahaofi ha toe tu'ulu 'a e ako 'i he fonua ni.
