Kalo e Palemia mei he fakataha ‘a e APEC ke feohi mo e ngaahi hoa ‘o e kau taki Featured
Palemia 'o Tonga mo e ni'ihi 'o e ngaahi hoa 'o e kau taki na'a nau kau atu ki e fakataha a e APEC 'i Papua New Guine
21 Novema, 2018. ‘Oku tuku mai foki ‘e he mitia faka-soisiale pea a’u pe ki he ni’i hi ‘o e kau faiongoongo muli ‘a e ‘ata ‘o ‘etau Tangata'eiki Palemia ‘oku kau atu ki he polokalama ‘a e ngaahi hoa ‘o e kau taki na’a nau kau atu ki he fakataha ni.
‘Oku anga maheni ‘aki pe foki ia ‘i he ngaahi fakataha lalahi pehe ni ‘oku ‘i ai pe ‘a e polokalama ia ki he ngaahi hoa ‘o e kau taki ‘o kau ai ‘enau ‘eve’eva holo pe ‘o a’u ki he’enau lava atu ‘o ‘eva ki he ngaahi matatahi pe koe ngaahi feitu’u ‘oku kaungatonu ki he anga fakafonua ‘o e fonua ‘oku nau ‘i ai mo e ngaahi fakafiefia kehe pe.
‘Oku ‘ikai foki ke ‘oatu ‘e he ‘imisi ko’eni ha ‘ata lelei ‘o e fonua ki Tu’apule’anga pea ‘oku ha ngali fakaoli ke tukuange ‘e he taki ia ‘a e fakataha mahu’inga na’e ‘uhinga ai ‘ene folau atu pea totongi ‘aki ‘a e pa’anga tukuhau ‘a e fonua kae kau atu ia ki he polokalama ‘a e kakai fefine ‘a ia ‘oku ho’ata mai ‘oku manukia ‘e he kau faiongoongo moe kakai muli pea ‘oku ne tukuhifo ai hono ngeia mo e fonua.
Na’e tuku mai foki ‘e he tangata faiongongo ‘iloa mei Nu’usila ka ‘oku lahi ‘ene ngaue ki he Pasifiki ko Micheal Field ‘i he mitia faka-sosiale ‘a e ‘ata ‘o e Palemia ‘a ia na’a ne fakalea ‘o pehe ‘i he lea faka-Tonga “Ko e Palemia ‘o Tonga ‘i he fakataha ‘a e APEC ‘i PNG - Li’aki ‘a e konga mahu’inga ‘o e fakataha ka e feohi mo e ngaahi hoa ‘o e kau taki”.
‘Oku fehu’ia heni ‘a e fatongia ‘o e kau fale’i mo e kau muimui folau pe koe ha na’e ‘ikai ke fale’i lelei ai ‘a e tangata’eiki he neongo ‘ene fie ‘eva mo e kau fefine pea ‘oku ‘i ai ‘ene tau’ataina ke ‘eva mo malolo pea 'oku 'ikai hano kovi ka ‘oku ‘i ai hono fatongia ki he fonua pea koe Palemia ia pea 'oku totonu ke kau atu ki he fakataha.
‘Oku fu’u mahino ‘oku ‘ikai koha ‘imisi lelei ‘eni ‘oku ‘oatu heni pea ‘oku fakakata ‘aki ‘e he ngaahi fonua ‘i he levolo faka-tipilometika mo faka-polofesinale pea ‘oku ‘ikai totonu ke to’o ma’ama’ama ‘eni he ‘oku ngali kovi ai ‘o ‘ikai ngata pe he Palemia ka koe fonua fakalukufua.
