Kuo ngaue nai ‘a e kau Polisi ki he ‘ekisiteni ‘a e me’alele ‘a e Minisita Leipa? ^Featured

Kolomotu’a

3 Septema, 2018

‘Etita,

Kataki mu’a kae hao atu ‘eku ki’i hoha’a ko’eni fekau’aki mo e ‘ekisiteni ‘a e mealele faka-Minisita ‘a e Minisita Leipa Tu’i Uata.

Kuo tuku mai ‘a e ngaahi ‘ata ‘o e me’alele 'i he mitia mo hono feinga’i ke ‘ave mei he feitu’u na’e hoko ai ‘a e fakatu’utamaki ni ‘i he po’uli ‘o e ‘aho Pulelulu 29 ‘o ‘Aokosi.

Ko e me’alele fo’ou foki ‘eni ‘i he kalasi Mazda pea ‘oku double cap ‘i he kalasi motolo fakamuimui taha lanu hinehina ‘ai ia ko hono mahu’inga ‘e ‘ikai toe si’isi’i hifo ‘i he $50,000-00.

‘Oku ma’u foki ‘e he ongoongo ni ‘a e fakamatala koe faka’uli pe ‘a e MInisita na’e faka’uli koe matapule mei Vaini pea na’e matu’aki lele lahi ‘i he Hala By-Pass lolotonga ia ‘oku konaa fe’ungatonu hifo mo e afe ki he ‘apiako Fokololo e Hau ‘o hoko ai ‘a e fakatu’utamaki ko’eni.

Ko e fakamatala mahino taha foki ‘e ma’u ia mei he Potungaue Polisi kapau ‘oku nau ngaue atu ki he keisi ko’eni pea ‘oku ‘i ai mo e totonu ia ‘a e kakai ‘o e fonua ke ‘ilo ki hono fakamoleki ‘enau pa’anga tukuhau he ta’etokanga mo e laulaunoa pehe ni.

‘Oku lahi pe foki hono tukuaki’i ‘i he mitia faka-sosiale ‘a e Minisita Tu'i Uata na’e kau ki he ‘ekisiteni ko’eni ka ‘oku mahu’inga foki ke fakamahino 'eni ia mei he Potungaue Polisi ‘a e mo’oni ke ‘oua ‘e fai ha hu’uhu’u pea aofangatuku ‘e he Fakamaau’anga.

‘Oku tokolahi e kau ngaue ‘i he Pule’anga ‘oku tuli pea fekau kenau totongi ‘i he’enau ta’etokanga ‘o maumau ai ‘a e ngaahi me’alele ‘a e Pule’anga pea ‘oku tau fakatauange ‘e ngaue’aki pe ‘a e lao, tu’utu’uni mo e founga ngaue tatau ki he ‘ekisiteni ko’eni.

Ko e me’alele foki ko’eni ‘oku motu ‘a e ongo va’e mu’a pea koe maumau lahi ‘oku hoko kiai.

‘Oku tau fakatauange pe ‘e fakahoko pe ‘a e founga ngaue totonu he 'oku fekau'aki tonu 'eni mo e kau taki 'oku nau malanga'i 'a e 'ofa he kakai moe faitotonu.

Faka’apa’apa Atu,

‘Ofa Fonua

Nuku’alofa